د پاکستان پوځ په دوو ناامنو ایالتونو کې د ۳۴ وسلهوالو د وژل کېدو خبر ورکړ
د وسلهوالو ډلو د بریدونو له زیاتېدو سره هممهاله، د پاکستان د پوځ ویاند د چهارشنبې په ورځ اعلان وکړ، چې ځواکونو یې په خېبرپښتونخوا او بلوچستان ایالتونو کې په جلا جلا عملیاتو کې لږ تر لږه ۳۴ وسلهوال وژلي دي.
د پوځ په خبرپاڼه کې راغلي، چې د پاکستان تحریک طالبان ډلې اړوند ۲۶ وسلهوال د سېشنبې په ورځ د خېبرپښتونخوا ایالت په ناارامه ولسوالیو، شمالي وزیرستان، لکي مروت او بنو کې په څلورو جلا نښتو کې وژل شوي دي.
په خبرپاڼه کې همدارنګه ویل شوي، چې اته بلوڅ بېلتونپال وسلهوال د بلوچستان ایالت ژوب ولسوالۍ کې د پاکستان له امنیتي ځواکونو سره په نښته کې وژل شوي دي. د پوځ د وینا لهمخې، له دغو کسانو څخه وسلې او مهمات هم ترلاسه شوي دي.
دا په داسې حال کې ده، چې پاکستان په وروستیو ورځو کې د بریدونو له نوې څپې سره مخ شوی دی؛ هغه څپه چې د دې هېواد چارواکي یې پړه پر افغان طالبانو او هند اچوي.
د امنیتي سرچینو په خبره، د چهارشنبې په ورځ ناپېژاندو وسلهوالو د خېبرپښتونخوا ایالت په باجوړ ولسوالۍ کې د پولیسو پر ګزمې ډزې وکړې، چې له امله یې څلور پولیس ووژل شول او دوه نور ټپیان شول. دا برید یوه ورځ وروسته له هغه ترسره شو، چې په دوو جلا بریدونو کې اووه پولیس چې پهکې یو لوړپوړی افسر هم شامل و، وژل شوي وو.
