په ۲۰۲۵ کال کې ۱۲۹ خبریالان او د رسنیو کارکوونکي وژل شوي
د خبریالانو د خوندیتوب کمېټې ویلي چې په ۲۰۲۵ کال کې د رسنیو په برخه کې د کار پر مهال د ۱۲۹ خبریالانو او د رسنیو کارکوونکو وژنې ثبت شوې، چې دوه پر درېمه برخه یې د اسراییلي ځواکونو په بریدونو کې وژل شوي.
د رویټرز د رپوټ له مخې، دا دویم کال دی چې په پرلهپسې توګه د خبریالانو وژنې په تاریخ کې نوی ریکارډ جوړوي او همدارنګه دویم کال دی چې د وژل شویو خبریالانو دوه پر درېمه برخه د اسراییل په بریدونو کې وژل شوي.
د راپور له مخې، په ۲۰۲۵ کال کې د اسراییلي ډزو له امله ۸۶ خبریالان وژل شوي، چې زیاتره په غزه کې فلسطیني خبریالان دي، خو د یمن د حوثیانو د رسنیو په مرکز کې هم ۳۱ خبریالان وژل شوي، چې دا د کمېټې د ثبت شوېو پېښو له مخې دویمه مرګونې پېښه وه.
د راپور په وینا، اسراییل له۴۷ پېښو څخه د۸۱ سلنه قصدي وژنو یا «قتل» په توګه مسوول و. د دقیقو معلوماتو ترلاسه کولو ستونزې په غزه کې د راپور تصدیق ستونزمن کړی، نو ممکن اصلي شمېر لا زیات وي.
په ډیرو پېښو کې اسراییل منلې چې په غزه کې یې خبریالان په نښه کړي، خو ادعا کوي چې هغوی له حماس سره اړیکې لرلې. نړیوالې رسنۍ دا ادعاوې ردوي.
اسراییل بهرني خبریالان غزې ته نه پرېږدي، نو ټول هغه خبریالان چې په دې سیمه کې وژل شوي، فلسطینيان ول.
د راپور له مخې، د ۱۲۹ وژل شویو خبریالانو لږ تر لږه ۱۰۴ یې د شخړو له پېښو سره تړاو درلود.
د غزې او یمن ترڅنګ، د خبریالانو لپاره تر ټولو خطرناکې سیمې سودان (۹ وژل شوي) او مکسیکو (۶ وژل شوي) وې. څلور اوکرایني خبریالان روسي ځواکونو ووژل او درې خبریالان په فلپین هېواد کې وژل شوي.
