اسټرالیا د خپلو ډیپلوماټانو له کورنیو وغوښتل چې له اسراییل او لبنان ووځي
د اسټرالیا حکومت په اسراییل او لبنان کې د خپلو ډیپلوماټانو له کورنیو غوښتي چې دغه دوه هېوادونه پرېږدي. دا پرېکړه په داسې حال کې شوې چې په سیمه کې د امریکا او ایران ترمنځ د احتمالي پوځي شخړې په اړه اندېښنې زیاتې شوې دي.
د اسټرالیا د بهرنیو چارو وزارت ویلي چې په متحده عربي اماراتو، قطر او اردن کې د مېشتو ډیپلوماټانو کورنیو ته هم د خوښې پر بنسټ د وتلو وړاندیز شوی، ځکه د سیمې امنیتي وضعیت مخ پر خرابېدو بلل شوی دی.
د امریکا ولسمشر ډونالډ ټرمپ د سېشنبې په ورځ کانګرس ته په خپله وینا کې وویل چې ایران ته به د اټومي وسلې د ترلاسه کولو اجازه ورنه کړي. هغه ایران د ترهګرۍ ستر ملاتړی وباله او د احتمالي برید خبره یې هم وکړه.
