امریکایي سناتوران: ټرمپ باید د ایران په اړه خپل نظامي پلانونه له ولس سره شریک کړي
د امریکا د سنا مجلس لوړپوړو ډیموکراتانو د ایران پر وړاندې د احتمالي برید لپاره د حکومت د نظامي چمتووالي په اړه په یوه محرمانه توجیهي غونډه کې له ګډون وروسته، له ډونالډ ټرمپ څخه وغوښتل چې خپل اهداف او استدلال په ښکاره ډول د امریکا له ولس سره شریک کړي.
د سنا د اقلیتونو مشر چاک شومر وویل، چې تر تړلو دروازو شا ته ناستې بسنه نه کوي او حکومت باید د «داسې یوې مهمې» موضوع په اړه خلکو ته وضاحت ورکړي.
د راپورونو پربنسټ، دغه محرمانه غونډه د بهرنیو چارو د وزیر او ملي امنیت د سلاکار مارکو روبیو او د سيایاې د رییس جان رتکلیف په شتون کې جوړه شوې وه. په ورته وخت کې، ټاکل شوې چې د امریکا او اسلامي جمهوریت مذاکره کوونکي د پنجشنبې په ورځ په جنیوا کې د تهران د اټومي پروګرام په اړه خبرې وکړي، خو ټرمپ په عین وخت کې په منځني ختیځ کې پراخ نظامي تشکیلات ځای پر ځای کړي او ویلي یې دي، چې د خپل جدیت ښودلو لپاره پر یو محدود برید غور کوي.
د سنا د استخباراتي کمېټې لوړپوړي ډیموکرات غړي مارک وارنر ټینګار وکړ، چې ولسمشر باید روښانه کړي چې د هر ډول نظامي اقدام هدف څه دی او د امریکا ګټې به څنګه خوندي شي. ټرمپ ویلي، چې ایران «په کلکه د هوکړې غوښتونکی دی» خو حاضر نه دی څرګنده ژمنه وکړي چې اټومي وسله به نه جوړوي.
