ټرمپ: امریکا له ونزوېلا نه تر ۸۰ مېلیون بېرله ډېر تېل ترلاسه کړي دي
د امریکا ولسمشر ډونالډ ټرمپ وایي، چې متحده ایالاتو تر دې دمه له ونزوېلا نه تر ۸۰ مېلیون بېرله ډېر تېل ترلاسه کړي دي. هغه ونزوېلا د امریکا «نوی دوست او ملګری هېواد» وباله.
ټرمپ تر دې وړاندې ویلي و، چې واشنګټن (د جنورۍ په ۳مه) په کاراکاس کې د نیکولاس مادورو تر نیولو وروسته د ونزوېلا د تېلو پر پلور او عایداتو لامحدود کنټرول غواړي. هغه د امریکا د تېلو شرکتونو لپاره د ونزوېلا د انرژۍ صنعت د بیا راژوندي کولو لپاره د ۱۰۰ مېلیارد ډالرو پانګونې پلان هم اعلان کړ او ویې ویل، چې ګټه به یې د ونزوېلا د خلکو، متحده ایالاتو او شرکتونو ترمنځ شریکه شي.
