د خیبر پښتونخوا په شمالي وزیرستان کې د چهارشنبې په ماښام د یوې دولتي لېسې ودانۍ د ډورن برید له امله ویجاړه شوې ده. ځايي پولیسو ویلي، دغه پېښه د شېوه کلي اړوند د میامي کابلخېل په سیمه کې شوې ده.
د خپرو شویو انځورونو له مخې؛ د «شمازان کوټ» دولتي لېسې ودانۍ په پراخه کچه ویجاړه شوې او نږدې ۸۰ سلنه برخه یې په کنډواله بدله شوې ده. د یادې سیمې اوسېدونکو هم ویلي، چې د یوې زورورې چاودنې غږ یې اورېدلی؛ خو چاته پهکې زیان نهدی اوښتی.
ځایي پولیسو ویلي، چې د پېښې په اړه یې پلټنې پیل شوې دي. تر دې وړاندې هم د خیبرپښتونخوا په ګڼو سیمو کې په بمونو د ښوونځیو د الوزولو راپورونه ورکړل شوي وو.
راپورونه ښيي، چې په وروستیو کلونو کې په شمالي وزیرستان او نږدې قبایلي سیمو کې یو شمېر ښوونیز مرکزونه په ورته بریدونو کې په نښه شوي دي. څو اوونۍ وړاندې هم په یاده سیمه کې په یوه برید کې یو ښوونکی او څو زدهکوونکي ټپیان شوي وو.
