د وچکالۍ له امله؛ په سومالیا کې ۶.۵ مېلیونه خلک له سختې لوږې سره مخ دي
د ملګرو ملتونو د خوړو نړۍوال پروګرام وایي، چې په سومالیا کې شاوخوا ۶.۵ مېلیونه خلک د وچکالۍ له امله له سختې لوږې سره مخ دي. یادې ادارې خبرداری ورکړی، چې د خوړو مرستې ښایي د د بودجې د کمښت له امله په راتلونکې اپرېل میاشت کې ودرول شي.
په سومالیا کې روان کړکېچ لسګونه زره خلک اړ اېستي، چې خپلې مېنې پرېږدي او د موګادیشو او نورو ښارونو په پنډغالو کې مېشت شي. د سومالیا لپاره د ملګرو ملتونو د بشري مرستو همغږي کوونکي جورج کانوي په یوه بیان کې ویلي: «د اوبو د لوړو بیو، محدودو خوراکي توکو او د بشري مرستو کمښت له امله وچکالي په خطرناکه توګه پراخه شوې ده».
تېره اونۍ د ملګرو ملتونو د خوړو نړۍوال پروګرام ویلي و، چې دامهال په سومالیا کې ۴.۴ مېلیونه کسان له سختې لوږې سره مخ دي. د یادې ادارې په وینا؛ دوی د روان کال له پیل راهیسې یوازې ۶۰۰زره کسانو ته خپلې مرستې راکمې کړې دي.
