خیبرپښتونخوا کې د روژې په لومړۍ اوونۍ تر ۲۰ ډېر پاکستاني سرتېري وژل شوي
د خیبر پښتونخوا په بېلابېلو سیمو کې د روژې میاشتې له پیل راهیسې د ناامنۍ پېښې زیاتې شوې دي. یوازې د روژې په لومړۍ اوونۍ د پولیسو، اېفسي او نورو امنیتي ځواکونو له ۲۰ ډېر سرتېري وژل شوي او ګڼ نور ټپیان دي.
خیبرپښتونخوا په ځانګړي ډول سویلي ولسوالۍ په وروستیو میاشتو کې د ناامنۍ له زیاتوالي سره مخ دي او د وسلهوالو ډلو د بریدونو اصلي هدف ګرځېدلې دي. راپورونه ښيي، چې د یاد ایالت په سویلي ولسوالیو کې پرلهپسې بریدونو ۱۳ پولیس وژلي او ۱۰ نور یې ټپیان کړي دي.
په کوهاټ کې بیا په یوه برید کې ۷ پولیس وژل شوي او ۴ نور ټپیان دي. دارنګه ډېره اسماعیل خان ته څېرمه د بهکر اړوند د پولیسو پر تالاشۍ مرکز ځانمرګي برید ۴ پولیس وژلي او ۴ نور یې ټپیان کړي دي. په بنو کې د امنیتي ځواکونو پر کاروان ځانمرګي برید کې د یوه لوړپوړي افسر په ګډون ۴ سرتېري وژل شوي دي.
سربېره پر دې پر اېف سي په یوه برید کې ۸ سرتېري ټپیان شوي دي. د کرک ولسوالۍ د بهادرخېل په سیمه کې وسلهوالو پر امبولانس برید کړی، چې له امله یې ۳ د اېفسي سرتېري وژل شوي دي.
په ډېره اسماعیل خان کې یو پولیس سرتېرى وژل شوی او ۲ نور ټپیان دي او د سوېلي وزیرستان په واڼه کې هم یو پولیس وژل شوی دی. ځایي پولیس چارواکي وايي، د روژې په میاشت کې د بریدونو د زیاتوالي له امله امنیتي عملیات چټک شوي چې په ترڅ کې یې په ډېره اسماعیل خان کې یوه ښځینه ځانمرګې بریدګره هم نیول شوې ده.
