د بښنې نړۍوال سازمان: په ایران کې اته تنه لاریونوال په اعدام محکوم شوي
د بښنې نړۍوال سازمان ویلي، چې د ایران حکومت د وروستیو پراخو لاریونونو په تړاو لږ تر لږه اته تنه اعتراض کوونکي په اعدام محکوم کړي دي او د دوو ماشومانو په ګډون ۲۲ تنه نور د اعدام له ګواښ سره مخ دي.
د بشري حقونو یاد نړۍوال سازمان ویلي، چې ایراني چارواکي د اعتراض کوونکو دوسیې په بېړه له قضایي پړاوونو تېروي. راپورونه ښيي، چې یاد کسان له عادلانه محاکمې بېبرخې شوي او پر هغوی لګول شوي تورونه تر شکنجې لاندې د جبري اعترافونو پر بنسټ دي.
