د افغانستان لپاره د ملګرو ملتونو د بشري حقونو ځانګړي راپور ورکوونکي ریچارد بېنېټ په جنیوا کې د ملګرو ملتونو د بشري حقونو ۶۱مې غونډې ته د وینا پرمهال ویلي، چې د طالبانو تر کنټرول لاندې افغانستان له ژور بشري او انساني ناورین سره مخ دی او دغه وضعیت خورا کړکېچن شوی.
هغه ویلي، روغتیايي سیستم کې د پانګونې کمښت، د نړۍوالو مرستو کمېدل او هغه محدودیتونه چې طالبانو لګولي؛ افغانستان له جدي ناورین سره مخ کړی دی. ښاغلي بېنېټ زیاته کړې، چې طالبان د ښځو او نجونو بنسټیز حقونه په ټولو برخو کې تر پښو لاندې کوي او دغه وضعیت د بشریت پر ضد د جرم ښکاره بېلګه ده.
د هغه په وینا؛ ښځې او ښځینه مرستندویانې د مرستو رسولو په لومړۍ کرښه کې دي، خو له پراخو محدودیتونو سره مخ دي. هغه ټینګار وکړ، چې اقتصادي ناورین، وچکالي، زلزلې او له ګاونډیو هېوادونو د شاوخوا دوه نیم مېلیونه کډوالو بېرته ستنېدل دغه ناورین لا ژور کړی دی.
بېنېټ وویل، چې د تېر کال په ترڅ کې د طالبانو د میداني سزاګانو شمېر د مخکې کلونو پرتله زیات و او مېلیونونه افغانان په ناامنو شرایطو کې ژوند کوي. هغه خبرداری ورکړی، هر څومره چې د ښځو پر حقونو بریدونه پراخ شي؛ طالبان به لا زړور شي.
هغه له غړو هېوادونو وغوښتل، چې د محدودیتونو د لغوه کېدو او د تبعیضي سیاستونو د پای ته رسېدو لپاره پر طالبانو فشار زیات کړي.
