د امریکا ولسمشر ډونالډ ټرمپ د ایران پروړاندې د امریکا د احتمالي برید له امله د تېلو د بیو د لوړېدو په اړه اندېښنې رد کړې او ټینګار یې وکړ، چې د خلکو ژوند او د هېواد اوږدمهاله امنیت ورته تر هر څه مهم دي.
ټرمپ د دې پوښتنې په ځواب کې چې ایا اندېښمن نه دی چې د ایران پروړاندې د امریکا د احتمالي برید له امله د تېلو بیې لوړې شي، وویل: «اندېښمن نه یم. زه د خلکو د ژوند په اړه اندېښمن یم. د دې هېواد د اوږدمهاله روغتیا/خوندیتوب په اړه اندېښمن یم. دا هغه څه دي چې زه یې په اړه اندېښمن یم».
هغه له اټومي تړون څخه د امریکا د اېستلو د اقدام په اړه د خوښۍ په څرګندولو سره وویل: «د اوباما تړون ترټولو بد تړون و. تر دې وړاندې چا داسې بد تړون نه و لیدلی. تر هر څه مخکې دا لنډمهاله و او ډېر مخکې باید پای ته رسېدلی وای. که اوس هم د اوباما هماغه تړون اجرا کېدای او ما لغوه کړی نه وای، ایران به اوس اټومي وسله درلوده او شرایط به هم توپیر درلود».
