د طالبانو د دفاع وزارت اعلان وکړ، چې د ډیورنډ کرښې په اوږدو کې یې په ځوابي بریدونو کې ۱۱۰ پاکستاني سرتیري وژلي او ۶۸ نور یې ټپیان کړي دي. طالبانو دا هم ادعا کړې چې د پاکستاني ځواکونو "۲۷پوستې" یې نیولې دي.
د پاکستان د اطلاعاتو او رسنیو وزیر عطاالله تارړ وايي چې د شنبې د سهار تر ۹ بجو پورې ۳۳۱ افغان طالبان او د تحریک طالبان پاکستان غړي او نور "ترهګر" وژل شوي او له ۵۰۰ څخه ډیر کسان ټپیان شوي دي.
ښاغلي تارړ د شنبې په ورځ پر اېکس خواله رسنۍ کې ولیکل، چې پاکستاني ځواکونو د طالبانو ۱۰۴ مرکزونه ویجاړ کړي، ۲۲ نور یې نیولي او ۱۶۳ ټانکونه او زغروال ګاډي یې ویجاړ کړي دي.
هغه وویل، چې د افغانستان دننه په ۳۷ ځایونو کې هوایي بریدونه شوي دي.
د پاکستاني چارواکو په وینا، وروستي بریدونه د ننګرهار، کندهار، پکتیا او د پاکستان د چترال په ځینو برخو کې ترسره شوي دي.
د پاکستان د وروستیو بریدونو په غبرګون کې د تحریک طالبان پاکستان مشر خپلو قومندانانو او جنګیالیو ته په یوه خپاره شوي لیک کې امر کړی چې په پاکستان کې دې داسې بریدونه ترسره کړي چې د دوی په وینا «د دښمن ملا ماته شي». هغه ویلي له افغانستان سره د همدردۍ په موخه دا امر کوي.
په یاد مکتوب کې چې د دې ډلې له لوري خپور شوی، د ټي ټي پي له سیمهییزو او ولایتي مسوولینو غوښتل شوي چې خپل فعالیتونه چټک کړي او بریدونه منظم او اغېزناک ترسره کړي. همداراز ټینګار شوی چې د عملیاتو معلومات دې په ویډیويي بڼه د رسنیو له لارې خپاره شي.
دا څرګندونې داسې مهال کېږي چې په سیمه کې د تاوتریخوالي کچه لوړه شوې او د امنیتي وضعیت په اړه اندېښنې زیاتې شوې دي.
تر اوسه افغان طالبانو او د پاکستان حکومت په دې اړه رسمي غبرګون نه دی ښودلی.
سرچینو افغانستان انټرنشنل ـ پښتو ته ویلي، چې پر کندهار ښار د بېپیلوټه الوتکو له څو ساعته ګزمې وروسته په ښوراندام سیمه کې برید شوی دی. سرچینو ویلي، چې په یاد برید کې دوه موټر په نښه شوي دي.
سرچینو افغانستان انټرنشنل ـ پښتو ته ویلي، چې د پنجشنبې په ورځ څو بېپیلوټه الوتکو د کندهار ښار پر اسمان الوتنې کولې.
د سرچینو د معلوماتو لهمخې، یادو بېپیلوټه الوتکو پر کندهار ښار له څو ساعته الوتنې وروسته، د کندهار ښار په پنځمه ناحیه کې د ښوراندام په سیمه کې هوايي برید وکړ.
سرچینو ویلي، چې په یاد برید کې دوه موټرونه په نښه شوي دي.
سرچینې د نوم نه ښودلو په شرط افغانستان انټرنشنل ـ پښتو ته وویل:«د روژه ماتي نږدې وخت و، په پنځمه ناحیه کې د مومند د مېوو مارکیټ مخ ته بېپیلوټه طیارې بمبارد وکړ، یو پاسو او ډاډسن موټر باندې بمبار شوی دی».
سرچینو ویلي، چې په یاد برید کې ۶ کسان ټپیان شوي او درې موټر زیانمن شوي دي.
پر همدغه مهال د کندهار ښار د ښوراندام د سیمې اوسېدونکو له افغانستان انټرنشنل ـ پښتو سره په خبرو کې ویلي، چې له برید وروسته، طالبانو د شوي برید د ځای په شاوخوا کې خلک له تګ راتګ څخه منع کړي دي.
طالبانو تر اوسه په رسمې ډول د یاد برید په تړاو څه نه دي ویلي.
په ورته مهال د کندهار اوسېدونکي وايي، چې اوس هم د کندهار ښار او سپین بولدک په فضا کې بېپیلوټه الوتکې ګرځي.
محلي سرچینو ویلي چې د پنجشنبې په ورځ د تخار ولایت د درقد ولسوالۍ د ځايي خلکو او طالبانو ترمنځ د «ځمکې او څړځایونو د غصب» پر سر نښته شوې ده. ځینې معترضان د طالبانو د ځواکونو په ډزو کې ټپیان شوي دي.
ځايي اوسیدونکي طالبان د «ځمکې په غصب او د غاصبانو په ملاتړ» تورنوي.
سرچینو ویلي چې دغه نښته د پنجشنبې پر غرمه د درقد ولسوالۍ د ګرګان کلي په شاوخوا کې شوې ده.
د راپورونو پر بنسټ، نښته د شاوخوا دوه زره جریبه ځمکې د غصب پر سر شوې ده. یوې سرچینې وویل چې د طالبانو ځايي مسولین د «ځمکو د غصب» په چاره کې رول لري، خو طالبانو تر اوسه په دې اړه څه نه دي ویلي او نه یې هم د شخړې ډول او لامل تایید کړی.
یوه بله محلي سرچینه وايي، چې شاوخوا دوه زره جریبه ځمکه، چې مخکې ځنګل و او اوس برابره شوې، د ځايي خلکو د شخړې لامل ګرځېدلې. د سرچینې په وینا، د ګرګان کلي اوسیدونکي د ځمکې د اوارولو په حال کې وو، خو د شاوخوا کلیو اوسیدونکو د ځمکې د اووارولو پر ضد اعتراض وکړ او له کليوالو سره نښته وشوه. دوی ادعا کوي چې دغه ساحه د سیمې د کلیو د خلکو څړځای دی.
سرچینو وویل چې د طالبانو ځايي چارواکو په دې شخړه کې لاس درلود او نښته یې تاوتریخوالي ته واړوله.
یوې سرچینې وویل چې د قوماندان غفار خپلوان، چې د طالبانو عسکر دي، په دې نښته کې رول لري. د هغه په وینا، د ولسوالۍ طالبان هم د دغه محلي قوماندان ملاتړ کوي.
یو ځايي اوسیدونکي وویل چې په دې نښته کې څو کسان ټپیان شوي دي او د شپږو ټپيانو وضعیت یې جدي بللی دی.
د افغانستان لپاره د پاکستان ځانګړي استازي محمد صادق له خپل ازبک سیال سره د یوې انلاین غونډې پر مهال ویلي، چې د طالبانو په کوربهتوب زرګونه وسلهوال د ګاونډیو هېوادونو لپاره جدي امنیتي ګواښونه رامنځته کوي. هغه وایي، دامهال په افغانستان کې د ازبک وسلهوالو شمېر تر ۲۵۰۰ زیات دی.
هغه پر اېکس پاڼه لیکلي: «ما له خپل ازبک سیال سره د امنیتي ننګونو په اړه خبرې وکړې، چې د طالبانو لهخوا په افغانستان کې مېشت زرګونه ترهګرو د ګاونډیو هېوادونو لپاره ګواښونه رامنځته کړي دي».
هغه زیاته کړې، د راپورونو له مخې په افغانستان کې دامهال د ازبک وسلهوالو شمېر تر ۲۵۰۰ زیات دی چې ښايي تر تحریک طالبان پاکستان (TTP) وروسته دویمه لویه وسلهواله ډله وي.
تېره ورځ د روسیې د بهرنیو چارو وزارت هم په خپل تازه راپور کې ویلي و، چې په افغانستان کې شاوخوا ۲۰ تر ۲۳زره «ترهګر» حضور لري چې له دې ډلې تر نیمایي ډېر یې بهرنيان دي. په دغه راپور کې ویل شوي، داعش د افغانستان تر ټولو لویه ترهګره ډله ده چې شاوخوا ۳زره غړي لري.
همدارنګه د پاکستاني طالبانو تحریک شاوخوا ۵ تر ۷زره غړي، القاعده ۴۰۰ تر ۱۵۰۰، د ختیځ ترکستان اسلامي غورځنګ ۳۰۰ تر ۱۲۰۰، د ازبکستان اسلامي غورځنګ چې اوس یې نوم د ترکستان اسلامي حزب ته بدل شوی ۱۵۰ تر ۵۰۰ او جماعت انصارالله ۱۵۰ تر ۲۵۰ غړي په افغانستان کې لري.