پر ډیورنډ کرښه د طالبانو او پاکستان ترمنځ د څو ورځو دوامداره جګړې او هوايي بریدونو له امله د خېبر ولسوالۍ په لنډي کوتل سیمه کې بېړنی حالت اعلان شوی او ټولې تعلیمي ادارې تړل شوې دي.
د طالبانو او پاکستان ترمنځ د روانې شخړې له امله د خېبرپښتونخوا د خېبر ولسوالۍ چارواکو نن د لنډي کوتل په سیمه کې بېړنی حالت اعلان کړی دی او ټولي دولتي او خصوصي تعلیمي ادارې یې تر نامعلومې مودې پورې تړلې دي.
د خېبر ولسوالۍ چارواکو د افغانستان انټرنشنل خبریال جواد شېنواري ته ویلي، چې په سیمه کې امنیتي وضعیت ته په پام سره یې احتیاطي تدابېر سخت کړي او د لنډي کوتل سیمې له زندان څخه یې بندیان هم انتقال کړي دي.
چارواکو ویلي، چې د لنډي کوتل له زندان څخه یې ۲۰ تنه بندیان د جمرود زندان ته انتقال کړي دي.
پر همدغه مهال د لنډي کوتل په مرکزي روغتون کې هم بېړنی حالت اعلان شوی دی.
د روغتون مسوول ډاکټر احتشام ویلي، چې د روغتون د ټولو کارکوونکو رخصتۍ یې لغوه کړې دي او د ۲۴ ساعته خدماتو وړاندې کولو لپاره یې چمتوالی نیولی دی.
د خېبر ولسوالۍ چارواکو ویلي، چې په لنډي کوتل سیمه کې د ژغورنې ادارې او نورو مرستندویه ادارو هم د بېړني حالت لپاره چمتوالي نیولي او د وینې په بانک کې اضافي وینه او اړین درمل هم ذخیره شوي دي.
د ولسوالۍ چارواکو له خلکو غوښتنه کړې ده، چې له غېرضروري تګراتګ څخه ډډه وکړي.
دا په داسې حال کې ده، چې له تېرو څو ورځو راهیسې د طالبانو او پاکستاني نظامیانو ترمنځ پر ډیورنډ کرښه سختي نښتې روانې دي او دواړه لوري یو او بل ته د درنو زیانونو د اړولو ادعاوې کوي.
