د طالبانو د اطلاعاتو او فرهنګ وزارت د لرغون پېژندنې اداره وايي، چې ۱۵۶ تاريخي اثار یې تر ترمیم، پاک کولو او ثبت وروسته له مرکزي لابراتوار څخه ملي موزیم ته لېږدولي دي. یادې ادارې زیاته کړې، چې په دغه اثارو کې کتیبې، جامونه او له خټينو ډبرو جوړ شوي وسایل شامل دي.
د طالبانو یاد وزارت د دوشنبې په ورځ ویلي، چې دغه اثار له دویمې زېږدیزې پېړۍ څخه تر پنځمې زېږدیزې پېړۍ پورې تړاو لري. د طالبانو تر واک لاندې د لرغون پېژندنې ادارې مشر ذبیح الله سادات وايي، چې دغه تاریخي اثار د افغانستان له تاريخي سیمو څخه د کېندنو پرمهال موندل شوي دي. ملي موزیم ته په سپارلو اثارو کې «لیکنې (کتیبې)، جامونه، بېلابېل ډوله څراغونه، د نخ کولو وسایل او نور څیزونه شامل دي، چې له خټینو، ډبرو، فلزاتو او صدفو جوړ شوي دي».
