په فاریاب او بادغیس کې د ګوزڼ ضد واکسینو کمپاین نن پیل شو

له «پولیو پاک افغانستان» سازمان وايي، چې د دوشنبې په ورځ (د کب ۱۱مه) د فاریاب او بادغیس ولایتونو په یو شمېر ولسوالیو کې د ګوزڼ ضد واکسینو کمپاین پیل شوی دی.

له «پولیو پاک افغانستان» سازمان وايي، چې د دوشنبې په ورځ (د کب ۱۱مه) د فاریاب او بادغیس ولایتونو په یو شمېر ولسوالیو کې د ګوزڼ ضد واکسینو کمپاین پیل شوی دی.
د یاد بنسټ په وینا؛ دغه کمپاین د فاریاب په پښتونکوټ، قیصار، المار، میمنه، شیرینتګاب او دولتاباد ولسوالیو او د بادغیس په بالامرغاب او غورماچ ولسوالیو کې عملي کېږي.
لاتر اوسه دا نهده روښانه شوې، چې په دغه دوو ولایتونو کې به څومره ماشومان واکسین شي. ورته مهال د روغتیا نړۍوال سازمان د روان کال د لړم میاشتې په راپور کې ویلي، سره له دې چې په افغانستان کې د پولیو پېښې کمې شوې؛ خو له ډيورنډ کرښې سره نږدې په سویلي سیمو کې د یاد ویروس د لېږد ګواښ لاهم لوړ دی.
د راپورونو له مخې؛ په ۲۰۲۵کال کې په افغانستان کې د پولیو ۹ مثبتې پېښې ثبت شوې دي. افغانستان او پاکستان لاهم د نړۍ هغه دوه هېوادونه دي، چې پهکې د ماشومانو د ګوزڼ ناروغۍ پېښې راپور کېږي.

د خېبر پښتونخوا ځایي چارواکي وایي، د یاد ایالت په بېلابېلو سیمو کې د بېاسناده افغانانو پر ضد عملیات پراخ شوي چې په ترڅ کې یې لسګونه افغانان نیول شوي او یو شمېر د تورخم له لارې افغانستان ته لېږدول شوي دي.
د پولیسو او ځايي ادارو په وینا؛ دغه اقدامات د پاکستان او طالبانو ترمنځ تر وروستیو نښتو وروسته سخت شوي دي. د پېښور پولیسو ویلي، د ښار په بېلابېلو سیمو کې یې چاپې وهلې او بېاسناده افغانان یې نیولي؛ خو د ټولو نیول شویو کره شمېر لا روښانه نهدی.
په جمرود کې تر ۵۰ ډېر افغانان نیول شوي او د قانوني بهیر تر بشپړېدو وروسته به له دغه هېواده واېستل شي. ورته عملیات په لنډي کوتل کې هم پیل شوي، چې نږدې لس کسان د تورخم له لارې افغانستان ته ستانه کړای شوي دي.
بل لور ته د ډيورنډ په کرښه د روان وضعیت له امله د لنډي کوتل بازار د دویمې ورځې لپاره هم تړلی و. همداراز د سوات پولیسو هم ۸۰ کسان نیولي دي. د بنو په ولسوالۍ کې هم د بېاسناده افغانانو پر ضد ۵۰ قضیې ثبت شوې دي.
په همدې حال کې د مهمند ولسوالۍ ادارې په حلیمزۍ او صافي حوزو کې مېشتو افغانانو ته وروستی خبرداری ورکړل شوی، چې د پېښور ځانګړو پنډغالو ته ولاړ شي؛ کنه له سخت قانوني چلند سره به مخ شي.
د افغانستان د جمهوري نظام د ملي امنیت پخوانی ريیس محمد معصوم ستانکزی وايي، که د افغانستان پوځ د پردیو په اشارې دوه ځله په بشپړه توګه نهوای ړنګ شوی، نو نن به هېچا هېواد ته په بده سترګه نشوای کتلی او د تېري جرات به یې نهدرلود.
محمد معصوم ستانکزي زیاته کړې: «که د افغانستان پوځ د پردیو په اشاره دوه ځله په بشپړه ټوګه نهوای ړنګ شوی، ملی او جهادي قوت په یوه قوت بدل شوی وای، نن به افغانستان په سیمه کی تر ټولو پیاوړی پوځ درلود او چا به هیواد ته په بده سترګه نشوای کتلی او د تېري جرات به یی نشو کولی. اوس هم د ستری پانګی ساتلو ته اړتیا ده».
هغه د کب ۹مې د سرتېري ملي ورځې ته په اشارې څرګنده کړې، افغان سرتېرو تل د هېواد او خلکو لپاره قرباني ورکړې او ټولنه د ملي یووالي د سمبول په توګه ورته درناوی لري.
د هغه په وینا: «د کب د ۹مې نمانځل په اوسنی حالت کې یوه خاصه ځانګړتیا لري، ځکه هېواد ورته اړتیا لري».
د کب ۹مه د سرتېري له ملي ورځې سره برابره ده. واک ته د طالبانو له بیا رسېدو وړاندې به دغه ورځ د افغانستان په بېلابېلو برخو کې د شانداره مراسمو په جوړېدو سره نمانځل کېده او خلکو به هم سرتېري د ګلونو په ګېډیو نازول.
د طالبانو له بیا واکمنېدو سره دغه ورځ نه نمانځل کېږي او همداراز په افغانستان کې د پخوانیو سرتېرو ژوند له ګواښونو سره مخ دی.
د افغانستان د خبریالانو مرکز د طالبانو لهخوا د محمد محقق اړوند «راه فردا» ټلوېزیون بندولو ته په غبرګون ویلي، چې طالبان باید د سیاستوالو د څرګندولو له امله رسنۍ بندې نهکړي.
د افغانستان د خبریالانو مرکز د یوې اعلامیې په خپرولو سره د طالبانو د اطلاعاتو او کلتور وزارت لهخوا د «راه فردا» ټلوېزیون تړلو ته سخت غبرګون ښودلی او یاده کړنه یې د بیان د ازادۍ او د ازادو رسنیو له اساسي اصولو سره په ټکر کې بللې ده.
د افغانستان د خبریالانو مرکز ویلي، چې طالبان باید د سیاستوالو د څرګندونو له امله رسنۍ بندې نهکړي.
په اعلامیه کې راغلي: «واکمن چارواکي باید د بیان ازادۍ او د هېواد د وضعیت په اړه د اشخاصو شخصي نظرونو ته که ورسره موافق وي او که نه، درناوی وکړي او د اړوندو رسنیو له تړلو ډډه وکړي».
دا په داسې حال کې ده، چې د طالبانو د اطلاعاتو او کلتور وزارت د شنبې په ورځ د یوې خبرپاڼې په خپرولو سره ویلي و: «د راه فردا ټلوېزیون د نشراتو د درولو او د محمد محقق د ملکیتونو د مصادره کولو پرېکړه له دې امله وشوه، چې نومړي د پاکستان د پوځي رژیم له لوري د افغان ملکي وګړو بمبار جایز بللی او د اسلامي امارت انتقامي بریدونه یې غندلي وو».
په هرات کې سرچینو د یکشنبې په شپه افغانستان انټرنشنل ته وویل، چې جنګي الوتکې د دې ولایت په اسمان کې ګرځي. دا لا تر اوسه نهده مشخصه شوې چې دغه الوتکې د کوم هېواد اړوندې دي. دا په داسې حال کې ده، چې د هرات پر ګاونډ یعنې ایران د امریکا او اسراییل هوايي بریدونه لا هم دوام لري.
د هرات اوسېدونکو بیا افغانستان انټرنشنل ته ویلي، چې د دغه ولایت پر فضا بېپیلوټه الوتکې ګرځي او د څو شېبو لپاره د ډزو غږونه هم اورېدل شوي دي.
له دې سره سم، د هرات د اسلامکلا پولې ته نږدې یوې سرچینې ویلي، چې د دغو الوتکو له الوتنې وروسته لږ تر لږه د دوو چاودنو غږونه هم اورېدل شوي دي.
طالب چارواکو لا تر اوسه د دغو الوتکو د هویت او په دې ولایت کې د ډزو د لامل په اړه څه نهدي ویلي.
د طالبانو د اطلاعاتو او کلتور وزارت د فرهنګ او هنر مرستیال عتیقالله عزیزي وايي، په دې روژې میاشت کې پر ایران بریدونه او پر افغانستان یرغل دا ښيي، چې [امریکا او پاکستان] په سیمه کې د شر او ستونزو د راپورته کولو په برخو کې سره همغږي دي.
عتیقالله عزیزي د کابلټایمز ورځپاڼې د خپرونو او فعالیت د ۶۴مې کالیزې په مناسبت جوړو شویو مراسمو کې وویل: «نن شاهدان یو چې په دې روژه کې پر ایران هم بریدونه وشول، نو دوی [پاکستان] هم زموږ پر هېواد یرغل وکړ. له دې دا معلومېږي چې دوی همغږي سره لري او دوی غواړي په سیمه کې فساد، شر او ستونزې جوړې کړي».
عزیزي زیاته کړه، پاکستان په افغانستان کې راغلی «امن، ثبات او پرمختګ» نهشي زغملی او دغه هېواد د افغانستان له ثبات او پرمختیا سره دوښمني لري.
هغه ویلی: «د دوی [پاکستان] دا فکر وو، چې موجوده نظام به د نورو نظامونو په څېر څه ورته ونهوايي او پرې ب سترګې پټې کړي، خو دوی په ډيورند کرښه او له کرښې ها خوا هم بېساری او تاریخي ځواب ورکړ».
په دې مراسمو کې د یاد وزارت د نشراتو مرستیال مهاجر فراهي وویل، دوی به د هر ډول یرغل پر وړاندې بېځوابه پاتې نهشي.
د یادونې وړ ده، چې د کابل ټایمز ورځپاڼه چې په انګلیسي ژبه خپرېږي، د ۱۳۴۰ لمریز کال د کب په ۸مه (۲۷ فبروري ۱۹۶۲م) د ظاهر شاه د سلطنت او د داوود خان د صدارت پر مهال د صباحالدین تر ریاست لاندې تأسیس شوه، چې په لومړیو کې په اونۍ کې دوه یا درې ځله خپرېده، خو شاوخوا دوه کاله وروسته یې خپل فعالیت د ورځپاڼې په نوم پیل کړ او تر نن ورځې خپریږي.