د جرمني لومړی وزیر فرېدرېښ مېرڅ وایي، د ایران اسلامي جمهوریت په ټوله نړۍ کې د «لسګونو کلونو ترهګرۍ» مسوول پاتې شوی او د دې نظام پای ته رسېدل به «د ایران او نړۍ لپاره ښه خبر» وي.
هغه زیاته کړه، چې پوځي بریدونه له خطره خالي نه دي او باید د ایران د کړکېچ لپاره د راتلونکي په اړه هم پلان جوړ شي.
مېرڅ ټینګار وکړ، چې غواړي د ایران له ولس سره مرسته وکړي، څو هغوی وکولای شي د خپل راتلونکي په اړه خپله پرېکړه وکړي. د هغه په وینا: «د ایران خلک باید وکولای شي په سوله او ډاډمن امنیت کې خپل راتلونکی وټاکي».
د مېرڅ په خبره، تر اوسه نه امریکا او نه هم اسراییل له جرمني څخه د اسلامي جمهوریت پر ضد په پوځي هڅو کې د مستقیم ګډون غوښتنه کړې ده.
