د پاکستان د لومړي وزیر سلاکار رانا ثناءالله ویلي، د افغانستان له خاورې د وسلهوالو بریدونو د مخنیوي لپاره اړتیا ده، چې پر ډیورنډ کرښه یوه "حایل سیمه" رامنځته شي ترڅو د ملګرو هېوادونو تر څارنې لاندې وي. نوموړي زیاته کړې، چې د داسې سیمې له جوړېدو سره افغان طالبان مخالف دي.
د اېکسپرېس ټرېبیون ورځپانې د راپور لهمخې، ثناءالله وويل: «موخې، ستراتيژيکي پلانونه او لاسته راوړنې چې پاکستان يې په لټه کې و، نږدې ترلاسه شوي او اوس يې د ټينګښت مرحله روانه ده».
نوموړي ټينګار وکړ، چې «د پاکستان اصلي موخه دا ده چې د افغانستان له خاورې د ترهګریزو فعاليتونو مخنيوی وشي او د ملګرو هېوادونو تر ګډ څار لاندې يوه حایل سيمه رامنځته شي». نوموړي زياته کړه، چې کابل د دې طرحې مخالفت کړی او ترهګریز فعاليتونه لا هم روان دي.
د پاکستان د لومړي وزير سلاکار د دې سرحدي سيمې د جوړولو د څرنګوالي په اړه نور جزیيات ورنه کړل. دا لومړی ځل دی، چې يو لوړپوړی پاکستانی چارواکی په رسمي ډول پر ډیورنډ کرښه د حایل سيمې د جوړولو خبره کوي. د حایل سيمې موخه دا ده، چې پر ډیورنډ کرښه پاکستاني او بهرني ځواکونه ځای پر ځای شي او د پاکستان خاورې ته د وسلهوالو د ننوتلو مخنیوی وشي.
د افغان طالبانو لهخوا څو ځلې دا ادعا رد شوې، چې پاکستاني وسلهوال د افغانستان له خاورې پاکستان ته ننوتي دي او دوی وايي، چې دغه وسلهوال په قبایلي سيمو کې ځينې ساحې تر کنټرول لاندې لري.
دې پاکستاني چارواکي ادعا وکړه، چې له طالبانو سره ډيپلوماتيکي هڅې د هند د لاسوهنې او نفوذ له امله ناکامې شوې دي. رانا ثناءالله زیاته کړه: «موږ له دوی څخه هېڅ څه نه غواړو، يوازې دا چې لاس واخلي. که لاسوهنه ونه کړي، موږ له هغوی سره جګړه نه لرو».
دا په داسې حال کې ده، چې د طالبانو او پاکستان تر منځ نښتو د افغانستان د سوېل او ختیځو ولايتونو شاوخوا ۶۰ زره خلک بې کوره کړې دي.
