د پاکستان د بهرنیو چارو وزیر د سېشنبې په ورځ وویل، خپل ایراني سیال ته یې خبرداری ورکړی چې هېواد یې باید پر سعودي عربستان برید ونهکړي. نوموړي د اسلاماباد او ریاض ترمنځ ګډ دفاعي تړون ته اشاره وکړه چې له مخې یې پاکستان مکلف دی د بهرنیو پوځي بریدونو پر وړاندې د سعودي ملاتړ وکړي.
د فایننشل ټایمز ورځپاڼې د راپور لهمخې، اسحاق ډار چې په ورته وخت کې د پاکستان د لومړي وزیر مرستیال هم دی، د ایران د بهرنیو چارو له وزیر عباس عراقچي سره د شنبې ورځې خبرو ته په اشارې وویل: «ما هغوی ته وویل چې موږ له ریاض سره یو دفاعي تړون لرو».
ډار ادعا وکړه، چې د همدې تړون له امله د نورو خلیجي هېوادونو پرتله د سعودي خاوره د ایراني توغندیو له بریدونو خوندي پاتې شوې ده. هغه وویل، چې تهران په بدل کې له سعودي څخه غوښتي چې د دغه هېواد خاوره دې د ایران پر ضد په نظامي چارو کې ونهکارول شي.
دا په داسې حال کې ده، چې د سعودي عربستان ولیعهد محمد بن سلمان او د پاکستان لومړي وزیر شهباز شریف د وږي په ۲۶مه په ریاض کې د متقابلې دفاع ستراتیژیک تړون لاسلیک کړ. د دغه تړون لهمخې، پر هر یوه هېواد برید به پر بل هېواد برید وګڼل شي.
فایننشل ټایمز لیکلي، د پاکستان د پارلمان د پخوانۍ بیانیې ترڅنګ له خبریالانو سره د اسحاق ډار د سېشنبې ورځې څرګندونې په اسلاماباد یا ریاض کې د یوه لوړپوړي چارواکي لومړۍ علني څرګندونې دي چې ښيي دا تړون ښايي د ایران پر وړاندې عملي شي.
د پاکستان د بهرنیو چارو وزیر دا خبرې په هغه ورځ وکړې، چې ایراني بېپیلوټه الوتکو په ریاض کې د امریکا پر سفارت برید وکړ او زیان یې ورساوه. تر دې وړاندې د دوشنبې په ورځ په راس تنوره کې د سعودي د تېلو په یوه لوی چاڼځای هم د بېپیلوټه الوتکې برید شوی و.
دا په داسې حال کې ده، چې پاکستان دا مهال په افغانستان کې له طالبانو سره په سختو سرحدي نښتو کې ښکېل دی.
سعودي عربستان هڅه کړې، چې ځان د ایران پروړاندې د امریکا او اسراییل له جګړې لرې وساتي. مخکې له دې چې امریکا او اسراییل پر ایران بمبارۍ پیل کړي، ریاض ویلي و چې اجازه به ورنکړي ترڅو خاوره یې د اسلامي جمهوریت پر ضد وکارول شي.ایران په وار وار ویلي و، چې د امریکا بریدونه جګړې ته سیمهییزه بڼه ورکوي. دغه هېواد تر اوسه د خلیج پر څو هېوادونو بریدونه کړي چې هدف یې پر واشنګټن د سیاسي او اقتصادي فشار راوړل دي، ترڅو له تهران سره نښته ودروي.د سېشنبې په ورځ د سپاه پاسداران یوه قوماندان ابراهیم جباري خبرداری ورکړ، چې د امریکا او اسراییل د بریدونو دوام به د دې لامل شي، چې ایران په منځني ختیځ کې پر «ټولو اقتصادي مرکزونو» بریدونه وکړي.جباري وویل: «موږ دوښمن ته وایو، که پرېکړه وکړي چې زموږ اصلي مرکزونه په نښه کړي، موږ به په سیمه کې ټول اقتصادي مرکزونه په نښه کړو».
