د پخواني جمهوري نظام د ولسمشر مرستیال پر خپل ایکس لیکلي چې د ملي یووالي، مشروع حکومت او اساسي قانون د تامین او د افغانستان د ځمکنۍ بشپړتیا د دفاع لپاره اوسني ملي بیرغ ته اړتیا ده. صالح وايي، د طالباني روایت او سمبولونو له لارې د ملت یووالی ناشونی دی.
صالح زیاتوي، تر هغه وخته چې د افغانستان خلک او لویه جرګه د ملي بیرغ په اړه پرېکړه ونه کړي، همدا یو بیرغ د هېواد یوازینی مشروع، قانوني او ملي بیرغ ګڼل کېږي.
نوموړي طالبان یوه غیرملي ډله بللې او ویلي یې دي چې د طالباني روایت او سمبولونو له لارې د ملت یووالی ناشونی دی.
د هغه په وینا، په وروستیو ورځو کې د طالبانو له لوري جوړې شوې غونډې پراخ ولسي ملاتړ نه لري او له څو کسانو تر څو سوه کسانو زیات کسان پکې نه راټولیږي.
صالح ټینګار کړی چې طالبانو د خلکو وجدان او سیاسي شعور کم ارزولی دی.
