ګوترېش: د اټومي وسلو د کارولو ګواښ تر ټولو لوړې کچې ته رسېدلی دی
د ملګرو ملتونو سرمنشي د وسلو د منع کولو او نه خپرېدو د پوهاوي نړۍوالې ورځې په مناسبت خبرداری ورکړی، چې په وروستیو لسیزو کې د اټومي وسلو د کارولو ګواښ لوړې کچې ته رسېدلی او د نړۍ امنیت له جدي ګواښ سره مخ دی.
د ملګرو ملتونو سرمنشي انټونیو ګوترېش د وسلو د منع کولو او خپرېدو د پوهاوي نړۍوالې ورځې په مناسبت د یوه پیغام په خپرولو سره ویلي، چې نړۍوال کړکېچونه او پوځي لګښتونه خورا لوړې کچې ته رسېدلي او د وسلو د ګرمې سیالۍ ترڅنګ د سپکو وسلو د خپرېدو او د نورو ټېکنالوژیکي جګړو کچه تر بل هر وخت لوړه شوې ده.
ګوترېش د هېوادونو پر مشرانو غږ کړی، چې ګواښونه کم کړي او د اټومي وسلو له ګواښونو هم په کلکه ډډه وکړي.
ګوترېش زیاته کړې:«د وسلو د سیالۍ پر ځای د سولې پر جوړښت پانګونه وکړئ او د دې وخت دی چې هېوادونه د وسلو د منع کولو په برخه کې پر خپلو نړۍوالو ژمنو عمل وکړي او د وژونکو وسلو د ازمایلو او کارولو مخه ونیسي».
