د بشري حقونو په چارو کې د فرانسې سفیره ایزابل روم له افغانستان انټرنشنل سره په خبرو کې ویلي، تر هغه چې د ښځو او بشري حقونو په اړه د طالبانو تګلاره بدله نهشي، دا ډله به په رسمیت ونه پېژندل شي.
هغې په خپلو خبرو کې همداراز ټینګار وکړ، چې نړۍواله ټولنه باید پر طالبانو فشارونه زیات کړي.
مېرمن روم په دې مرکه کې زیاته کړه، چې د طالبانو پر وړاندې د فرانسې دریځ له وړاندې روښانه و؛ دغه هېواد نه له طالبانو سره خبرې کوي او نه هم ورسره حکومتي همکاري لري. د هغې په وینا: «د فرانسې ټول ملاتړ له افغان ولس سره دی، که هغه بشردوستانه مرستې وي او که د مدني ټولنو پیاوړتیا».د بشري حقونو په چارو کې د فرانسې سفیره دغه راز وايي، چې اوسمهال د فرانسې مرستې د غېردولتي موسسو له لارې ترسره کېږي، نه د طالبانو له لوري.نوموړې د طالبانو په تړاو د فرانسې دریځ ته په اشارې سره وویل، د دغې ډلې پر وړاندې دا د فرانسې بنسټیزه پرېکړه ده، ځکه د بشري حقونو ناقضینو ته مشروعیت ورکول د دغه هېواد له حقوقي او اخلاقي ارزښتونو سره سمون نهلري.نوموړې دغه څرګندونې په داسې حال کې کوي، چې طالبانو پر افغان ښځو او نجونو د سختو محدودیتونو په لګولو سره نه یوازې د هغوی بنسټیز بشري حقونه تر پښو لاندې کړي، بلکې د زدهکړو او کار په مخنیوي سره یې هغوی له ټولنیز ژوند څخه په بشپړ ډول څنډې ته کړي، چې دې چارې په کور دننه او نړۍواله کچه توند غبرګونونه راپارولي دي.
