د افغانستان د کرېکټ ملي لوبډلې د نړۍوالې شورا په تازه ټیمي ډلبندۍ کې ۷م مقام خپل کړ
د کرېکټ نړۍوالې شورا تازه د نړۍ د کرېکټ لوبډلو ډلبندي اعلان کړې. د دغه ډلبندۍ له مخې؛ د افغانستان د کرېکټ ملي لوبډلې د پنځوس اوریزو سیالیو په برخه کې د نړۍ ۷م مقام او دارنګه د شل اوریزو سیالیو په برخه کې د نړۍ ۱۰م مقام خپل کړی دی.
د یادې شورا د تازه راپور له مخې؛ په یو ورځنیو سیالیو کې د هند ملي لوبډله د ۵زره او ۳۷۷ امتیازونو په ترلاسه کولو سره د جدول په سر کې راغلې ده. اسټرالیا د ۴زره او ۱۳۴ امتیازونو سره دویم ځای خپل کړی او پاکستان د ۴زره او ۱۳۴ امتیازونو په لرلو سره په درېیم مقام کې دی. په همدې برخه کې د افغانستان د کرېکټ ملي لوبډلې د ۲زره او ۱۳۴ امتیازونو په لرلو سره د نړۍ اووم مقام خپل کړی دی.
په شل اوریزو سیالیو کې هم هند د ۲۲زره او ۶۱۳ امتیازونو په ترلاسه کولو سره د جدول په سر کې دی. انګلستان بیا د ۱۴زره او ۳۰۰ امتیازونو سره دویم او اسټرالیا د ۱۶زره او دوه امتیازونو په لرلو سره د ټیټ رېټنګ له امله په درېیم مقام کې راغلې ده. افغانستان په دې برخه کې د ۱۱زره او ۵۰۴ امتیازونو سره د نړۍ لسم مقام خپل کړی دی.
