پاکستان وایي سعودي سره د تړون په اساس د حرمین شریفین د ساتنې لپاره هر ډول اقدامات کولای شي
د پاکستان د پارلماني چارو وزير ډاکټر طارق فضل چوهدري ويلي، چې د دغه هېواد اټومي وسلې يوازې د پاکستان د دفاع لپاره دي. د ده په خبره، پاکستان له سعودي سره دفاعي تړون لري او د همدې هوکړې لهمخې به اسلاماباد د حرمين شريفين د ساتنې لپاره له هېڅ ډول هڅې څخه ډډه ونهکړي.
د هغه په وينا، د هېواد د ځمکنۍ بشپړتيا ساتنه او د ملي واکمنۍ خوندي کول د حکومت تر ټولو مهم لومړيتوب ګڼل کېږي.
د جیونیوز په یوې خپرونه کې د تحريک انصاف پاکستان ګوند غړي ډاکټر نثار جټ هم له دې دريځ سره موافقه څرګنده کړه. هغه وويل، چې د حرمين شريفين د دفاع لپاره يې لبيک ويلی او هر ډول همکارۍ ته چمتو دی.
بل لور ته د دفاعي چارو شنونکي جاوېد اقبال وويل، چې پاکستان دا مهال د ۲۸ ورځو لپاره د تېلو زېرمې لري او د مايع ګاز (اېل پي جي) زېرمه يې نږدې د ۱۲ ورځو لپاره بسنه کوي. هغه زياته کړه، که د هرمز تنګي لاره وتړل شي، نو پاکستان له سعودي عربستان سره د شوې هوکړې له مخې کولای شي د بديلو لارو له لارې تېل هېواد ته وارد کړي.
