د بښنې نړیوال سازمان: طالبان دې خپله نوې جزایي اصولنامه لغوه یا تعدیل کړي
د بښنې نړیوال سازمان له طالبانو غوښتي چې خپله نوې جزایي اصولنامه لغوه یا تعدیل کړي او هغه دې د نړیوالو بشري حقونو له معیارونو سره برابره کړي. دغه سازمان له نړیوالې ټولنې هم غوښتي چې دا مقرره په کلکه وغندي او پر طالبانو فشار زیات کړي تر څو د بشري حقونو سرغړونې پای ته ورسوي.
د بښنې نړیوال سازمان وايي چې په افغانستان کې د طالبانو له خوا تصویب شوې نوې جزایي اصولنامه به د ښځو او لږکیو پر وړاندې تاوتریخوالی او تبعیض لا زیات کړي.
دغه سازمان په خپل تازه راپور کې ویلي چې د «طالبانو نوې جزایي اصولنامه» د جرمونو او سزاوو په اړه پراخ او مبهم مواد لري چې د بشري حقونو د لا محدودېدو لامل ګرځي.
د راپور له مخې، په دې مقرره کې کورنی تاوتریخوالی یوازې هغه وخت جرم بلل شوی چې د ښځې هډوکي د مېړه له خوا مات یا هم د ښځې بدن زخمي شي.
د بښنې نړیوال سازمان د سویلي اسیا څانګې مشرې سمریتي سینګ ویلي: «له دې جزایي قانون سره د طالبانو کړنې نورې هم شدیدې او ظالمانه کېږي چې ښځې او نجونې یې تر ټولو ډېرې اغېزمنې کړي، ځکه دا مواد کورنی تاوتریخوالی عادي کوي او د هغوی د تګ راتګ او خپلواکۍ پر وړاندې نور محدودیتونه لګوي».
راپور زیاتوي چې په اصولنامه کې د دیني اصولو د نه مراعتولو لپاره سختې سزاوې ټاکل شوې، د ټولنیز مقام له مخې د مجرمانو لپاره بېلابېلې سزاوې ټاکل شوې او حتا ځینې مواد داسې دي چې غلامي په رسمیت پېژني.
همدارنګه د دې دې اصولنامې ځینې مادې د وهلو او نورو جسمي سزاوو اجازه ورکوي او د ځینو جرمونو لپاره د اعدام سزا هم پراخوي.
د طالبانو مشر د روان کال د جنورۍ په پنځمه دغه اصولنامه تصویب کړې او د عملي کېدو لپاره یې اړوندو ادارو ته لېږلې ده.
