د شمالي وزیرستان په مېرانشاه کې د پاکستاني نظامیانو پوستې ته څېرمه چاودنه شوې ده
ځايي امنیتي سرچینو ویلي، چې د شمالي وزیرستان په مرکز میرانشاه کې نن ماښام د پاکستاني پوځیانو پوستې ته نږدې چاودنه شوې ده. د پولیسو د مالوماتو له مخې چاودنه د میرانشاه په چشمه پول سیمه کې موټر بم په واسطه ترسره شوې ده.
پاکستاني چارواکي وايي، چې تر دې دمه د پاکستان امنیتي ځواکونو د مرګ ژوبلې په اړه کره معلومات نشته.
ځايي اوسېدونکي وايي، چې د چاودنې ځای یو له ګڼې ګوڼې ډک وړوکی بازار دی.
د سیمې د خلکو په وینا، د پېښې ځای ته نږدې د تېلو پمپ، عام دوکانونه او نور کاروباري مرکزونه موجود دي.
د میرانشاه روغتون مشر ایم ایس اصف اقبال افغانستان انټرنشنل - پښتو ته وویل، چې تر دې مهاله ۱۴ ټپیان روغتون ته وروړل شوي دي.
د پېښې وروسته په روغتون کې بېړنۍ حالت اعلان شوی او د نورو ټپیانو د راوړلو لپاره چمتووالی نیول شوی دی.
بل لور ته د پاکستان امنیتي ځواکونو د پېښې سیمه کلابنده کړې ده.
د عیني شاهدانو په وینا، په سیمه کې د امنیتي ځواکونو له لوري ډزې هم شوي دي.
تراوسه کومې وسلوالې ډلې د برید مسوولیت نه دی منلی خو له دې وړاندې ورته بریدونه د پاکستاني طالبانو له لوري ترسره شوي دي.
