پاکستان سعودي عربستان ته الوتنې بېرته پيل کړې
پاکستان وايي، سعودي عربستان ته الوتنې په بشپړ ډول بېرته پيل شوې او د دوبۍ پر لور الوتنې هم تر يوه حده بيا فعالې شوې دي. پر ایران د امریکا او اسراییل د بریدونو له پیل سره د نړۍ له بېلابېلو هېوادونو څخه منځني ختیځ او عربي هېوادونو ته الوتنې له جدي ګډوډیو او بندېدو سره مخ شوې.
د پاکستان دولتي راډیو په اسلاماباد کې د هوایي چلند د چارواکو له قوله راپور ورکړی، چې د پلازمېنې، په ګډون له لاهور او کراچۍ څخه خلیج هېوادونو ته ځینې الوتنې بېرته پیل شوې دي. چارواکي وايي، چې د خليج په څو هېوادونو کې د هوايي حريم بندېدو او د الوتنو د ګډوډیو له امله پاکستان شاوخوا ۲۰ ميليارده روپۍ عايد له لاسه ورکړی دی.
په نړۍواله کچه هم دې کړکېچ د هوايي سفرونو پر بهير پراخ اغېز کړی دی. د راپورونو لهمخې، سره له دې چې د بند پاتې مسافرو د لېږد لپاره ځانګړې الوتنې تنظيم شوي، خو د متحدو ایالتونو په ګډون د اسراییل او ایران تر منځ د شخړو له امله په ټوله نړۍ کې له ۱۳ زرو څخه ډېرې الوتنې لغوه شوې دي.
