جنوبي وزیرستان کې د بمي چاودنې له امله دوه پاکستاني پولیس وژل شوي
پاکستاني پولیس وايي، چې د جنوبي وزیرستان په واڼا ښار کې د بمي چاودنې له امله دوه پولیس وژل شوي او د ملکي وګړو په ګډون ۱۲ کسان ټپیان شوي دي. پولیسو وویل، چې چاودېدونکي توکي د ګڼې ګوڼې په سیمه کې د یوه سوپر مارکیټ دروازې ته نږدې ځای پر ځای شوي وو.
تراوسه کومې وسلوالې ډلې د برید مسوولیت نه دی منلی خو له دې وړاندې ورته بریدونه د پاکستاني طالبانو له لوري ترسره شوي دي.
تېره ورځ هم ځايي امنیتي سرچینو ویلي و، چې د شمالي وزیرستان په مرکز میرانشاه کې د پاکستاني پوځیانو پوستې ته نږدې چاودنه شوې ده.
دا پېښې په داسې وخت کې رامنځته شوه، چې پاکستان کې د ناامنۍ او تاوتریخوالي د زیاتوالي لامل دغه هېواد د افغان طالبانو لخوا د ټي ټي پي ملاتړ بولي.
د یادونې وړ ده، چې پر افغانستان د پاکستاني پوځیانو هوايي بریدونه ادامه لري خو دوی تراوسه د ټي ټي پي د مهمو مشرانو په وژلو کې پاتې راغلي، د افغان طالبانو او د نړیوالو سازمانونو مستند راپورونه ښیي چې په پاکستاني بریدونو کې ۵۶ ملکي وګړي وژل شوي او ۱۲۹ ټپیان شوي دي.
