زیلینسکي وايي د ایران د ډرون الوتکو د مخنیوي لپاره ۱۱ هېوادونو ترې مرسته غوښتې
د اوکراین ولسمشر ولادیمیر زېلېنسکي وایي چې کیېف د ایران له ګاونډیو هېوادونو، یو شمېر اروپايي دولتونو او امریکا نه د امنیتي مرستو ۱۱ غوښتنې ترلاسه کړې دي. هغه وویل دغو هېوادونو د بېپیلوټه الوتکو د مخنیوي وسایلو، د برېښنایي جګړې سیستمونو او پوځي روزنې غوښتنه کړې ده.
زیلینسکي زیاته کړه چې له لوړپوړو پوځي او دولتي چارواکو سره تر غونډې وروسته یې د «شاهد» ډرونونو او ورته ګواښونو پر وړاندې د امنیتي همکاریو غوښتنې په تفصیل ارزولې دي.
د هغه په وینا، د ځینو غوښتنو په اړه لا دمخه عملي پرېکړې شوې او مشخصې مرستې هم برابرې شوې دي.
