د امریکا ولسمشر ډونالډ ټرمپ د دوشنبې په ورځ وویل، اسټرالیا هېواد ته د ایران د ښځینه فوټبال ملي ټیم د لوبغاړو د بېرته ستنېدو په اجازه ورکولو سره، «یوه لویه بشري تېروتنه» کوي. هغه د اسټرالیا له لومړي وزیر څخه وغوښتل، چې د دې ټیم غړو ته پناه ورکړي.
د اسیا د ښځو ملتونو جام سیالۍ چې کوربهتوب یې اسټرالیا کوي، پر ایران د متحده ایالاتو او اسراییل د هوایي بریدونو له پیل سره سمې پیل شوې؛ هغه بریدونه چې د راپورونو لهمخې پهکې د ایران مذهبي مشر علي خامنهیي ووژل شو. د ایران ټیم د یکشنبې په ورځ له فیلیپین څخه د ۲ پر صفر ماتې خوړلو وروسته له دې سیالیو حذف شو.
ټرمپ په خپله «ټروث سوشال» شبکه کې لیکلي: «اسټرالیا ایران ته د دغه هېواد د ښځینه فوټبال ملي ټیم د لوبغاړو په جبري ستنولو سره، یوه لویه بشري تېروتنه کوي؛ ځکه هلته د هغوی د وژل کېدو احتمال خورا زیات دی. که تاسو هغوی نه منئ، متحده ایالات به پناه ورکړي».
په واشنګټن کې د اسټرالیا سفارت د ټرمپ د خبرو په اړه د رسنیو پوښتنو ته سمدستي ځواب نه دی ویلی.
د اسټرالیا «اېسبياېس نیوز» رسنۍ راپور ورکړی، چې د ایران د ښځینه فوټبال ملي ټیم پنځه لوبغاړې له اردو څخه جلا شوې او اوس د اسټرالیا د فدرالي پولیسو تر ساتنې لاندې دي او له دغه هېواد څخه یې د مرستې غوښتنه کړې ده. د راپور پر بنسټ، حکومتي سرچینو هم دغه موضوع تایید کړې او ویلي یې دي، چې د اسټرالیا د کورنیو چارو وزیر ټوني برک له دغو لوبغاړو سره د لیدنې لپاره د بریزبن ښار ته تللی دی.
د فوټبال د لوبغاړو نړۍوالې اتحادیې (فیفپرو) هم تر دې مخکې اعلان کړی و، چې د دغه ټیم د غړو د خوندیتوب په اړه جدي اندېښنې شته، ځکه چې د هغوی ځینې لوبغاړې د یوې مسابقې پر مهال د ایران د ملي سرود له لوستلو څخه د انکار له امله د نیوکو او ګواښونو هدف ګرځېدلي دي.
د سوېلي کوریا پر وړاندې د لومړۍ لوبې پر مهال د ملي سرود په وخت د لوبغاړو چوپتیا د ایران د دولتي رسنیو د یوه ویاند له لوري «د بېعزتۍ اوج» وبلل شو.له دې سره، د ایران د ښځینه ټیم لوبغاړو له اسټرالیا سره د خپلې دویمې لوبې په ترڅ کې ملي سرود ولوست او پوځي سلام یې ورکړ، هغه اقدام چې د بشري حقونو د فعالانو د اندېښنې لامل شو او ویل کېږي، چې ښايي دوی د دولتي چارواکو تر سخت فشار لاندې وي.د دغو لوبغاړو د پناهندګۍ د احتمال په اړه د یوې پوښتنې په ځواب کې د اسټرالیا د بهرنیو چارو او سوداګرۍ وزارت مرستیال مټ ټیسلټویټ وویل، د دغه هېواد حکومت «د محرمیت د مسایلو له امله د فردي دوسیې په اړه څه نهشي ویلی».
