هالنډ په ایران کې د خپل سفارت فعالیتونه په لنډمهاله توګه باکو ته ولېږدول
د هالنډ د بهرنیو چارو وزارت اعلان وکړ، چې په ایران کې د دغه هېواد د سفارت کارکوونکو ته د امنیتي ګواښونو د زیاتوالي له امله د سفارت فعالیتونه په لنډمهاله توګه د اذربایجان جمهوریت پلازمېنې باکو ته لېږدول شوي دي.
د هالنډ د بهرنیو چارو د وزیر په وینا، د سفارت کارکوونکي په پوره سلامتیا سره اذربایجان ته لېږدول شوي او د هالنډ حکومت په دې ستونزمنو شرایطو کې د هغوی د هڅو ستاینه کړې ده.
دغه وزارت همدارنګه ویلي، چې په ایران کې بدلونونه په دوامداره توګه تر څارنې لاندې دي او که امنیتي شرایط ښه شي، په تهران کې به د سفارت د فعالیتونو د بېرته پیلېدو د وخت او څرنګوالي په اړه پرېکړه وشي.
د دې خبرپاڼې پر بنسټ، اوسمهال د هالنډ اړوند قونسلي خدمتونه ښايي د باکو له لارې تعقیب شي.
