کردي وسلهوال وایي چې د ایران حکومت پر ضد وسله والې مبارزې ته چمتو دي
د فرانسې خبري اژانس راپور ورکوی چې د ایران کردي وسلهوالې ډلې وایي، د تهران د حکومت پر ضد د مقابلې لپاره چمتو دي او د یوه پاڅون په تمه ناست دي. د ایران اسلامي جمهوري دولت بیا دغه ډلې «ترهګر سازمانونه» بولي او د هغوی فعالیت د امنیتي ګواښ په توګه تعریفوي.
فرانسې خبري اژانس ليکلي چې د نورو ايراني کردي وسلهوالو ډلو په څېر د کردستان د حیات ازاد ګوند (پژاک) د عراق د کردستان په خودمختاره غرنیو سيمو کې اډې لري او ويل کېږي چې د ايران دننه په کرد مېشتو سيمو کې هم پټنځایونه لري.
د فرانسې خبري اژانس وايي، دا ډلې په وروستيو کلونو کې د سياسي فشارونو لاندې وې.
همدې موضوع دا پوښتنې راپورته کړې دي چې ايا دا ډلې اوس هم دومره توان لري چې د ايران پر ضد يو وسلهوال بريد پيل کړي که نه.
په راپور کې دا هم راغلي چې د تېرې مياشتې په وروستيو کې د منځني ختيځ جګړې له پيل وروسته چې د ايران پر ضد د امريکا او اسرایيل له بريدونو سره پيل شوې، تهران څو ځله په عراق کې د کردي وسلهوالو ځواکونو پر اډو بريدونه کړي دي او هغوی يې تورن کړي چې د لوېديځ او اسرایيل د ګټو لپاره کار کوي.
