د امریکا ولسمشر له «فاکسنیوز» سره په مرکه کې ټینګار وکړ، چې د ایران پر وړاندې د امریکا او اسراییل د ګډو پوځي عملیاتو لومړنۍ پایلې «له تمې ډېرې زیاتې» وې. نوموړي وویل، چې د بریدونو په لومړۍ څپه کې د ایران شاوخوا ۵۰ سلنه توغندیز توان له منځه وړل شوی دی.
ډونالډ ټرمپ په دې مرکه کې چې د کب پر ۱۹مه نېټه خپره شوه، د هغه څه دفاع وکړه چې نوموړي یې د «ایران پر وړاندې د امریکا او اسراییل د ګډو پوځي عملیاتو بریا» وبلله.
هغه په ټینګار سره وویل، چې د دغو عملیاتو لومړنۍ پایلې «له تمې ډېرې زیاتې» وې.
ټرمپ همدارنګه وویل: «فکر نه کوم چې هغه (مجتبی خامنهيي) دې په ارامۍ ژوند وکړي».
دا د مجتبی خامنهيي په تړاو د ټرمپ اشاره وه، چې په اسلامي جمهوریت کې د نوي مشر په توګه ټاکل شوی او ټرمپ ویلي دي، چې له دې ټاکنې راضي نه دی.
د پوځي عملیاتو پر بریا د ټرمپ ټینګار
د امریکا ولسمشر له فاکسنیوز سره په خپلو خبرو کې زیاته کړه، چې د اسلامي جمهوریت پر مرکزونو د امریکا او اسراییل د ګډو بریدونو په لومړۍ څپه کې د ایران د حکومت د توغندیز توان لویه برخه په نښه شوې ده.
هغه وویل: «کله چې مو لومړی ځل پر دوی برید وکړ، ۵۰ سلنه توغندي مو یې له کاره وغورځول؛ که مو دا کار نه وای کړی، د جګړې دوام به ډېر سخت وای».
بلخوا، د امریکا د پوځ مرکزي قوماندانۍ (سنټکام) هم اعلان کړی چې د کب پر ۹مه نېټه د عملیاتو له پیل راهیسې په ایران کې له پنځو زرو ډېر پوځي مرکزونه په نښه شوي دي.
ټرمپ لومړنی برید یو «پرېکنده اقدام» وباله او ویې ویل، چې په امریکا کې بل هېڅ ولسمشر د ورته اقدام جرئت نه درلود.
