د ایران د کړکېچ او د انرژۍ د بیو په اړه د اوو صنعتي هېوادونو د مشرانو ناسته جوړېږي
د فرانسې ولسمشرۍ ماڼۍ اعلان وکړ، چې د دغه هېواد ولسمشر امانوېل مکرون به د چهارشنبې په ورځ (د کب ۲۰مه) د اوو صنعتي هېوادونو له مشرانو سره یوه ټلیفوني ناسته وکړي، ترڅو د ایران د کړکېچ او د انرژۍ د بیو د لوړېدو په اړه خبرې اترې وکړي.
د رویټرز خبري اژانس د راپور لهمخې، دا ناسته داسې مهال جوړېږي چې د جي ۷ هېوادونو حکومتونه د ایران پر وړاندې د امریکا او اسراییل له بریدونو وروسته، د تېلو د بیو د شدید لوړېدو پر وړاندې د غبرګون پر څرنګوالي غور کوي.
په همدې حال کې، د اوو صنعتي هېوادونو د انرژۍ وزیرانو د سېشنبې په ورځ د تېلو د ستراتیژیکو زېرمو د ازادولو په اړه له پرېکړې ډډه وکړه او د انرژۍ له نړۍوال اژانس څخه یې وغوښتل، چې تر هر ډول اقدام وړاندې د بازار وضعیت وارزوي.
