افغان سوک وهونکی شکران پرواني به په لندن کې د «PIVOTAL» سوک وهنې سیالۍ کې برخه واخلي، دغه سیالۍ د (Top Tier Boxing) سازمان لهخوا ترسره کېږي. که څه هم د نوموړي سیال لاتراوسه نهدی ټاکل شوی؛ خو ټاکل شوې چې دغه لوبه د ۱۴۰۵کال (د غویي په ۱۱مه) ترسره شي.
دغه سیالي به د لندن ښار په یورک تالار کې ترسره شي او دا به د Top Tier Boxing سازمان لهخوا تنظیم شوې د شکران پرواني لومړۍ سیالي وي. شکران پرواني چې د جرمني اتل دی او د سوک وهنې نړۍوال فدراسیون (WBF) کې د بریاوو تاریخ لري، په خپل مسلک کې ۲۰ بریاوې او یوه ماته لري.
هغه په ۲۰۱۷کال کې د WBF لقب وګاټه او په ۲۰۱۹کال کې د جرمني د سوک وهنې سبک اتل شو. شکران پرواني چې ۱۹۳ سانتي متره لوړه ونه لري، په ۱۹۹۲کال کې په کابل کې زېږېدلی دی. هغه په ۱۹۹۹کال کې په جرمني کې پناه واخیسته او اوس په هامبورګ کې ژوند کوي.
دغه افغان سوک وهونکي د ۲۰۱۷کال د سپتمبر په لومړۍ نېټه د ۲۴کلنۍ په عمر په هامبورګ کې د یوګن ماریک په وړاندې خپله مسلکي لوبه پیل کړه. هغه د همدې کال د اګست په پنځمه نېټه په ایسن کې فرانک بلومله ته په ماتې ورکولو سره د سوک وهنې نړۍوال فدراسیون د اتل لقب ترلاسه کړ.
