شهباز شریف په یوه لنډ او ناڅاپي سفر سعودي عربستان ته تللی
د پاکستان لومړی وزیر شهباز شریف د پنجشنبې په ورځ د څو ساعته لنډ سفر لپاره سعودي عربستان ته تللی. د شریف سفرداسې مهال دی، چې بلومبرګ د نوموړي د ویاند له قوله راپور ورکړ چې پاکستان د منځني ختیځ د تاوتریخوالي په زیاتېدو سره چمتو دی د اړتیا په وخت کې د سعودي عربستان ملاتړ وکړي.
د پاکستان د لومړي وزیر دفتر ویلي چې دا سفر د سعودي ولیعهد شهزاده محمد بن سلمان په بلنه شوی.
دواړه اړخونه به د سیمې د روانو ترینګلتیاوو، د امنیت وضعیت او د پاکستان او سعودي عربستان ترمنځ د دوه اړخیزو اړیکو په اړه بحث وکړي.
د شریف سفرداسې مهال دی، چې بلومبرګ د نوموړي د ویاند له قوله راپور ورکړ چې پاکستان د منځني ختیځ د تاوتریخوالي په زیاتېدو سره چمتو دی د اړتیا په وخت کې د سعودي عربستان ملاتړ وکړي.
ویاند مشرف زیدي ویلي چې اسلاماباد به هر وخت چې اړتیا وي له ریاض سره مرسته وکړي او ټینګار یې کړی چې د دواړو هېوادونو ترمنځ امنیتي همکاري اوږده سابقه لري، چې تېر کال د سپتمبر په میاشت کې د متقابل دفاعي تړون له لاسلیک وروسته لا پیاوړې شوې.
