په سوات، شانګله او مانسهره کې د تندر پرېوتو له امله څلور کسه مړه شوي دي
د خیبر پښتونخوا په شانګله، مانسهره او سوات ولسوالیو کې د چهارشنبې په سهار د سختو ورښتونو او تندر پرېوتو له امله څلور کسه مړه شوي دي. د شانګلې ولسوالۍ په لیلونای اچار سیمه کې پر یوه کور د تندر پرېوتو له امله د یوې ښځې او ماشوم په ګډون درې کسه مړه شوي دي.
دا په داسې حال کې ده، چې د دویمې پرلهپسې ورځې لپاره د خیبرپښتونخوا په بېلابېلو برخو کې تر سختو ورښتونو وروسته د ځمکې ښویېدنې او سېلابونو راوتلو راپورونه ورکړل شوي دي. د قراقرم لویه لاره هم د تګراتګ لپاره تړل شوې، چې له امله یې د ښځو او ماشومانو په ګډون ګڼ شمېر مساپر بند پاتې دي.
د برېښنا ستنو نړېدو له امله بیا پوران، مارتونګ او مخوزي سیمو ته برېښنا پرې شوې ده. له بل پلوه په مانسهره ولسوالۍ کې هم د تندر پرېوتو له امله یو کس مړ شوی دی.
