ناروې د امریکا سفارت مخې ته د ماین چاودنې پېښې په تړاو درې کسه نیولي دي
د ناروې پولیسو په اوسلو ښار کې د امریکا سفارت مخې ته د ماین چاودنې پېښې په تړاو درې عراقي وروڼه نیولي دي. دوی د یکشنبې په ورځ د امریکا سفارت دروازې ته نږدې تر ماین چاودنې وروسته ونیول شول، دغه چاودنې مرګ ژوبله نهلرله.
د ناروې ځایي چارواکو ویلي، دغه چاودنه چې د یکشنبې په سهار وشوه؛ د سفارت کونسلګرۍ ته د ننوتلو دروازه یې ویجاړه کړه، خو ځاني زیان یې نهلاره. د ناروې د پولیسو یو چارواکي په خبري ناسته کې وویل، چې د دغه پېښې د انګېزې په اړه پلټنې روانې دي.
کرېسټین هاټلو زیاته کړه: «موږ لاهم د څو فرضیو پر بنسټ کار کوو. له هغو فرضیو څخه یوه دا ده، چې وکتل شي ایا د دغه چاودنې تر شا د کوم جکومتي بنسټ لاس شته که نه». هغه وویل: «د نړۍوال وضعیت او د امریکا سفارت په نښه کولو ته په پام، دغه فرضیه ښایي سمه وي».
هغه زیاته کړه، پولیس دا احتمال هم نه ردوي چې دغه درې کسان دې له جرمي شبکو سره تړاو ولري. د ناروې امنیتي خدماتو تېره میاشت د خپلو کلنیو ارزونو په راپور کې ویلي و، چې ایران ښايي د خپلو عملیاتو د ترسره کولو لپاره له جرمي شبکو کار واخلي.
د امریکا سفارتونه پر ایران د امریکا او اسراییل له وروستیو بریدونو وروسته له لوړ ګواښ سره مخ دي.
