سياېناېن او نیویارکټایمز: د میناب ښوونځی ښايي د امریکا له لوري په تېروتنې په نښه شوی وي
د امریکا دوو خبري شبکو راپور ورکړی، چې د «لومړنیو پوځي څېړنو د موندنو» لهمخې، په میناب ښارګوټي کې یو لومړنی ښوونځی د امریکايي ځواکونو له لوري په تېروتنې سره په نښه شوی.
سياېناېن د پوځي څېړنو له لومړنیو موندنو سره د دوو باخبره سرچینو په حواله لیکلي، چې د امریکا پوځ په ناڅاپي ډول د شجره طیبه پر ښوونځي برید کړی دی.
په ایران کې دولتي رسنیو ویلي، چې د دغه برید په پایله کې لږ تر لږه ۱۶۸ ماشومان او ۱۴ ښوونکي وژل شوي دي.
سياېناېن په دې اړه اشاره کړې، چې پر دغه ښوونځي برید ښايي د هغه سیمې ته نږدې د یوې سمندري اډې په اړه د زړو استخباراتي معلوماتو له امله شوی وي.
د نیویارکټایمز ورځپاڼې هم د «څېړنو له لومړنیو پایلو سره د باخبرو سرچینو» په حواله لیکلي، چې دغه تېروتنه د دفاعي استخباراتو د ادارې د زړو معلوماتو له امله رامنځته شوې ده.
نیویارکټایمز زیاته کړې، د سپوږمکۍ د انځورونو ارزونه ښيي چې د ۲۰۱۳ او ۲۰۱۶ کلونو ترمنځ د سپاه پاسداران د مجتمع او یاد ښوونځي ترمنځ یو دېوال جوړ شوی و. دغې ورځپاڼې لیکلي، چې په دې اړه څېړنې لا هم روانې دي.
تر دې وړاندې د ملګرو ملتونو بېلابېلو بنسټونو په تېره بیا د ملګرو ملتونو د بشري حقونو عالي کمېشنرۍ او د حقیقت موندونکې ډلې په خپلو اعلامیو کې د دغه برید د خپلواکې پلټنې غوښتنه کړې وه.
