د پاکستان د بهرنیو چارو وزارت وايي چې کابل ته تللي پلاوي د اسلام اباد استازیتوب نه کاوه
د پاکستان د بهرنیو چارو وزارت ویاند طاهر اندرابي، نن د پنجشنبې په ورځ ( کب په ۲۱مه) ویلي چې کابل ته د درې کسیز پاکستاني پلاوي سفر رسمي نه و او دغه کسان په شخصي ډول افغانستان ته تللي.
اندرابي په یوه خبري غونډه کې وویل چې د پاکستان حکومت د طالبانو له چارواکو سره د خبرو لپاره کوم رسمي پلاوی کابل ته نه دی استولی. د هغه په وینا، کابل ته تللي کسان « درانه اشخاص» دي، خو دا سفر د پاکستان د حکومت له خوا نه دی تنظیم شوی او دوی د پاکستان د حکومت استازیتوب نه کوي.
د پاکستان د بهرنیو چارو وزارت ویاند همداراز ټینګار وکړ چې د اسلاماباد پالیسي د افغانستان په اړه بدله شوې نه ده او پاکستان تر اوسه له طالبانو داسې تضمین نه دی ترلاسه کړی چې د افغانستان له خاورې به پر پاکستان د وسلهوالو بریدونه ودرول شي.
هغه زیاته کړه چې ملګري ملتونه هم په دې اړه شواهد لري.
اندرابي د طالبانو د دفاع وزیر د خبرداري په غبرګون کې، چې ویلي یې وو که پر کابل برید وشي اسلام اباد به هدف وګرځي، وویل چې اسلام اباد لا له وړاندې له بریدونو سره مخ دی.
نوموړي همداراز وویل چې د دواړو هېوادونو ترمنځ لارې لا هم تړلې دي او په دې اړه کومه نوې پرېکړه نه ده شوې. هغه ټینګار وکړ چې اسلاماباد غواړي د افغانستان له خاورې د پاکستان پر ضد د وسلهوالو ډلو فعالیتونه ودرول شي.
تر دې وړاندې ځینو سرچینو ویلي وو چې د پاکستان او طالبانو ترمنځ د کړکېچ کمولو د لارو چارو د ارزونې لپاره کابل ته یو پاکستانی پلاوی تللی او په دغه پلاوي کې د پاکستان ځینې مذهبي او جهادي څېرې مولوي فضلالرحمن خلیل، مولوي عبدالله شاه مظهر او مولوي ساجد عثمان شامل دي.
