یو شمېر کورنیو، چې د جمهوريت دورې د شهیدانو او معلولینو د امتیازي معاشونو د ترلاسه کولو حق لري، افغانستان انټرنشنل ـ پښتو ته په لېږلو پیغامونو کې شکایت کړی چې معاشونه یې نه دي ورکړل شوي او کارکوونکي ورته وایي چې له اختر وروسته دې د خپلو معاشونو پوښتنه وکړي.
د دغو کورنيو په وينا، په طالبانو پورې اړوند شهیدانو کورنیو ته امتیازات ورکړل شوي، خو د جمهوريت دورې د شهیدانو امتیازي معاشونه تر اوسه معطل پاتې دي او هېڅ څرګند دلیل یې نه دی بیان شوی.
افغانستان انټرنشنل ته رسېدلی یو مکتوب ښیي چې د طالبانو د مالیي وزارت د وړاندیز او د دغې ډلې مشر د حکم له مخې ویل شوي چې د دولتي کارکوونکو د ۱۴۰۴کال د سلواغې او کب معاشونه دې له کوچني اختر څخه مخکې ورکړل شي.
خو دغو کورنیو ویلي چې د کب میاشتې امتیازات لا ځنډول شوي دي. دغه کورنۍ دا هم وایي چې د طالبانو اړوند د شهیدانو کورنیو ته امتیازي معاشونه (د دواړو میاشتو سلواغې او کب) ورکړل شوي دي.
افغانستان انټرنشنل ته په رالیږلو پیغامونو کې یو کس چې نه غواړي نوم یې واخیستل شي ویلي: «اته نيم زره افغانۍ معاش لرم، خو د غوړیو د پېرلو پیسې نه لرم. مخکېني معاشونه مې قرضدارانو ته ورکړي، اوس د اختر لپاره هیڅ نه لرم».
دا په داسې حال کې ده چې تر دې مخکې د کابل ښار یو شمېر اوسېدونکو افغانستان انټرنشنل ـ پښتو ته په لېږلو پیغامونو کې د توکو له لوړو بیو شکایت کړی و. دوی وايي چې د خوراکي توکو، تېلو او مایع ګازو بیې په وروستیو ورځو کې لوړې شوې دي او د دوی پر ورځني ژوند یې اغیز کړی.
د طالبانو او پاکستان تر منځ د وروستۍ جګړې او د ایران او منځني ختیځ د کړکېچ له امله په افغانستان کې د توکو بیې لوړې شوې دي، چې له امله یې د عامو افغانانو ورځنی ژوند اغیزمن شوی دی.
دا مهال د افغانستان او پاکستان تر منځ پر ډېورنډ کرښه ټولې سوداګریزې لارې تړلې دي، چې له امله یې سوداګري هم په ټپه درېدلې ده.
