د طالبانو د کور او ښار جوړولو وزارت خبر ورکړی، چې د زابل ولایت په اړوندو سیمو کې یې بېرته راستنو شویو کډوالو ته د استوګنې نمرې وېشلې دي. د یاد وزارت په وینا؛ د کډوالو د دایمي مېشتېدو او مناسب استوګنځي برابرولو په موخه ټولټال ۳۳۹ نمرې پر اړمنو کورنیو وېشل شوې دي.
د طالبانو یاد وزارت تر دې وړاندې په نورو ولایتونو کې هم د ځمکو له وېش خبر ورکړی و. سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال بیا له بېکارۍ او د سرپناه له نشتوالي شکایت کوي او له دې ډلې ځینې کسان هڅه کوي بېرته پر ناقانونه لارو له هېواده ووځي.
طالبان دغه څرګندونې داسې مهال کوي، چې په تېرو څلورو کلونو کې له درېیو هېوادونو څه باندې ۷ مېلیونه افغانان هېواد ته ستانه شوي دي. د طالبانو د کډوالو او بېرته راستنېدونکو چارو وزارت ویلي، چې د یادې ډلې له واکمنېدو راهیسې له پاکستان، ایران او ترکیې هېوادونو ۵۹۷۸۶۳ کورنۍ چې د غړو شمېر یې ۴مېلیونه او ۲۸۳زرو ته رسېږي؛ په جبري ډول او خپله خوښه بېرته افغانستان ته ستانه شوي دي.
