د افغانستان د وزلوبې ملي لوبډله له نهو کلونو ځنډ وروسته نړیوالو سیالیو ته ځي
د طالبانو د المپیک او بدني روزنې ادارې مشر، احمد الله وثیق، ویلي چې د افغانستان د وزلوبې ملي لوبډله به له نهو کلونو ځنډ وروسته یو ځل بیا د قزاقستان په کوربهتوب د «کوک پار» نړیوالو سیالیو کې ګډون وکړي.
د نوموړي په وینا، دغه سیالۍ به د روانې میلادي میاشتې په ۱۵مه نېټه پیل شي او د همدې میاشتې تر ۲۱مې به دوام وکړي.
وثیق زیاته کړه چې په دغو سیالیو کې به د افغانستان تر څنګ د نهو هېوادونو لوبډلې برخه واخلي.
وزلوبه یا کوک پار د منځنۍ اسیا او افغانستان دودیزه لوبه ده چې په وروستیو کلونو کې یې نړیوالې سیالۍ هم جوړېږي.
