سرچینو افغانستان انټرنشنل ته منلې، چې په «تالو» څانګه کې د افغان ځوانانو ووشو لوبډله د بودجې د کمښت له امله په چین کې د ځوانانو اولمپیک د غوراوي په سیالیو کې له ګډون کولو پاتې شوه.
د معلوماتو له مخې؛ په دغه سیالیو کې د ګډون لپاره د نوم لیکنې او چمتووالي اعلان وروستۍ نېټه د ۲۰۲۶کال د مارچ ۸مه ټاکل شوې وه. د پلان له مخې؛ د افغانستان د ووشو لوبډلې غړي باید د ۱۴۰۵ کال (د وري په ۳مه) چین ته سفر وکړي، چې په سیالۍ کې برخه واخلي؛ خو ویل کېږي چې د افغانستان د بدني روزنې ادارې د بودجې د نشتوالي له امله د لوبډلې د سفر لګښتونو له ورکولو ډډه کړې ده.
ټاکل شوې ده، چې د ځوانانو اولمپیک نړۍوالې لوبې په سېنګال کې ترسره شي او د غوراوي سیالۍ به یې په راتلونکو ورځو کې د چین په تیانجېن کې پیل شي؛ دا ځل به دغه سیالۍ د افغان لوبغاړو له ګډون پرته ترسره شي.
ووشو د افغانستان یو له هغو لوبو څخه ده، چې په نړۍوالو سیالیو کې یې ګڼ مډالونه ګټلي دي. له دې ډلې محمد طه د روان کال (د زمري په ۶مه) یې د اسیا د ځوانانو په اتلولۍ کې د تالو په کټګورۍ کې د سرو زرو مډال وګاټه او د اتلولۍ مقام یې خپل کړ.
خو لاتر اوسه د ورزش برخې چارواکو او د افغانستان د ووشو فدراسیون په رسمي ډول په دغه سیالیو کې د افغان لوبډلې د نه ګډون په اړه څه نهدي ویلي.
