روسیه وايي چې ۶۵ اوکرایني بېپیلوټه الوتکې یې رانسکورې کړې دي
د مسکو ښاروال سرګي سوبیانین وايي، چې د روسیې د هوايي دفاع واحدونو د شنبې په ورځ (د کب ۲۳مه) ۶۵ اوکرایني بېپیلوټه الوتکې چې د مسکو په لور روانې وې، وېشتلي او رانسکورې کړې دي.
د مسکو ښار وال ویلي، چې عملیاتي ډلې د ډرون الوتکو د پاتې شونو پر څېړلو بوختې دي.
د نوموړي له لوري پر ټېلګرام په یوه خپاره شوې بیان کې راغلي، چې د یادو بېپيلوټه الوتکو د شنډولو عملیات په ۱۱ ساعتونو کې بشپړ شوي دي.
دا په داسې حال کې ده، چې د روانې اونۍ په جریان کې اوکرایني ځواکونو اعلان کړی وو، چې د روسیې په بریانسک سیمه کې یې د توغندیو د پرزو جوړولو یوه مهمه فابریکه په نښه کړې او روسي چارواکو هم تایید کړې وه، چې په یاد برید کې ۷ کسان وژل شوي وو.
