د اسراییل پوځ وايي په بیروت کې یې د حزبالله پر تاسیساتو تازه بریدونه پیل کړل
د اسراییل پوځ د دوشنبې په سهار اعلان وکړ، چې په لبنان کې یې د خپلو پوځي عملیاتو پر دوام په پلازمېنه بیروت کې د حزبالله ډلې پر مهمو زېربناوو او تاسیساتو پراخ بریدونه پیل کړي دي. دا بریدونه د بیروت پر سوېلي څنډو «ضاحیه» له یوې درنې بمبارۍ وروسته پیل شوي.
اسوشېټېډ پرېس خبري اژانس لیکلي، چې د یادو بریدونو په اړه تر اوسه د ځاني زیانونو په اړه کوم جزییات نه دي ورکړل شوي.
په ورته مهال د اسراییل پوځ په بیروت او همداراز د لبنان په سوېل کې د ډېرو سیمو د تخلیې امر کړی و.
د دغه اژانس د راپور لهمخې، د لبنان د روغتیا وزارت ویلي چې د «صور» په سیمه کې د یوه هوایي برید له امله درې کسان وژل شوي او درې نور ټپیان دي. د راپور لهمخې، په «مرجعیون» سیمه کې د یوه بل هوایي برید په پایله کې دوه کسان وژل شوي او څلور نور ټپیان شوي دي.
