د سره صلیب نړۍوال فدراسیون د اسیا – پاسیفیک څانګې او د سرې میاشتې ټولنې اعلان کړی، چې په افغانستان کې د وروستیو نښتو له زیاتېدو وروسته پکتیکا ولایت ته د بېړنیو مرستو او سرپناه توکي لېږي؛ څو له زیانمنو کورنیو سره مرسته وشي.
د سره صلیب نړۍوال فدراسیون د اسیا – پاسیفیک څانګې او سرې میاشتې ټولنې پر اېکس پاڼه لیکلي، چې په افغانستان کې د وروستیو جګړو له زیاتېدو وروسته بشري اړتیاوې مخ په زیاتېدو دي.
یاد فدراسیون ویلي، چې د دغه مرستو په لړ کې به د سرپناه او نورو بېړنیو توکو بنسټیزې زېرمې پکتیکا ولایت ته واستول شي. د دوی په وینا؛ دغه مرستې به د افغانستان د سرې میاشتې ټولنې په همکارۍ هغو کورنیو ته ورسېږي، چې تر ټولو ډېرې اړتیاوې لري.
د یاد فدراسیون په خبره؛ «بشري اړتیاوې مخ په زیاتېدو دي او د زیانمنو خلکو ملاتړ اوس تر بل هر وخت ډېر مهم دی». دغه ادارې ټینګار کړی، چې د وضعیت له بدلون سره سم به هڅه وکړي؛ څو تر ټولو اړمنو کورنیو ته ژرترژره مرستې ورسوي.
