انتونیو ګوترېش: مسلمانان په نړۍ کې له تبعیض او ناعادلانه تګلارو سره مخ دي
د ملګرو ملتونو سرمنشي انتونیو ګوترېش ویلي چې مسلمانان د نړۍ په بېلابېلو هېوادونو کې له تبعیض، ټولنیزو او اقتصادي محرومیتونو او د کډوالۍ له مغرضانه تګلارو سره مخ دي. هغه دا څرګندونې له اسلام د وېرې(اسلاموفوبیا) پر ضد مبارزې نړېوالې ورځې په مناسبت کړې دي.
ګوترېش، نن یکشنبه د کب په ۲۴مه پر اېکس ولیکل، چې مسلمانان نه یوازې له تبعیض سره مخ دي، بلکې کله ناکله بېدلیله څارل کېږي او د هغوی پر وړاندې دوسیې هم جوړېږي.
هغه په خپلو څرګندونو کې ویلي «راځئ یو ځل بیا د برابرۍ، بشري حقونو او د هر انسان د کرامت د درناوي لپاره ژمنه وکړو، پرته له دې چې د هغه دین څه وي.»
د ملګرو ملتونو سرمنشي تر دې وړاندې هم په نړۍ کې د تلپاتې سولې د ټینګښت، د کړکېچونو د کمېدو او د تبعیض د له منځه وړلو غوښتنه کړې وه.
نوموړي ټینګار کړی چې د ملګرو ملتونو منشور د هېوادونو ترمنځ د اړیکو بنسټ دی او د اختلافاتو د سولهییز حل لارښود ګڼل کېږي.
ګوترېش ویلي چې که دولتونه د منشور اصولو ته ژمن پاتې شي، دا کار کولای شي د تاوتریخوالي او کړکېچونو د پراخېدو مخه ونیسي او د یوې خوندي او عادلانه نړۍ د رامنځته کېدو لامل شي.
