په فرانسه کې د ښاروالیو ټاکنې تر راتلونکو څو ساعتونو پیلېږي

د رویټرز د راپور له‌مخې، ښاروالان په فرانسه کې تر ټولو د باور وړ چارواکي دي چې د نږدې ۳۵۰۰۰ ښاروالیو مشري کوي؛ له لویو ښارونو نیولې تر هغو کلیو پورې چې ډېر کم اوسېدونکي لري.

رایه اچونه د یکشبنبې په سهار ۸ بجو پیلېږي او د شپې په ۸ بجو پای ته رسېږي. په ډېریو منځنیو او لویو ښارونو کې به دویم پړاو ټاکنې ۷ ورځې وروسته ترسره شي. د محلي ټاکنو پایلې کولی شي ملي کچې ته لاره هواره کړي، په ځانګړې توګه کله چې دا د ولسمشرۍ ټاکنو ته دومره نږدې ترسره کېږي. د نظر پوښتنو له‌مخې، سختدریځه ښي اړخی ګوند یا «ار‌اېن» د راتلونکي کال د ولسمشرۍ ټاکنو د ګټلو چانس لري.

دغه ګوند د کډوالۍ ضد او د اروپایي ټولنې مخالف ګوند دی. که څه هم یاد ګوند په سلګونو ښاروالیو کې نوماندان لري، خو د سترې بریا تمه نه‌لري، مګر هیله من دی چې خپل مخ پر زیاتېدونکی محبوبیت وښیي او په څو لویو ښارونو کې بریاوې ترلاسه کړي، څو د ولسمشرۍ کمپاین یې نور هم پیاوړی شي.

د یادونې وړ ده، چې د ۲۰۲۷ کال په اپرېل کې د ولسمشرۍ ټاکنو ته په کتو دغه ټاکنې، د ټولو ګوندونو لپاره خورا برخلیک ټاکونکې دي.