سلام حنفي: موږ له هېچا سره جګړه او ستونزې نه غواړو
د طالبانو د ریاستالوزرا اداري مرستیال عبدالسلام حنفي د دغې ډلې او پاکستان ترمنځ وروستیو نښتو ته په اشارې، له ګاونډیو او د سیمې له هېوادونو سره د متقابل درناوي پر بنسټ د ښو اړیکو غوښتنه کړې او ویلي یې دي، چې له هېچا سره جګړه نه غواړي.
د طالبانو تر واک لاندې ارګ په یوې خبرپاڼه کې ویلي، چې د ریاستالوزرا اداري مرستیال عبدالسلام حنفي له یو شمېر سیاسي شنونکو سره د روژه ماتي پر مهال له ګاونډیو او د سیمې له هېوادونو سره د متقابل درناوي پر بنسټ پر ښو اړیکو ټینګار کړی دی.
په خبرپاڼه کې د عبدالسلام حنفي له قوله لیکل شوي: «موږ له هېچا سره جګړه او ستونزې نه غواړو. د متقابل درناوي پر بنسټ له ګاونډیو، د سیمې له هېوادونو او نړۍ سره ښې اړیکې غواړو؛ خو که څوک زموږ ملي حاکمیت نقض کړي، نو د خپل ولس او نظام دفاع پر ټولو لازم ده».
دغه لوړپوړي طالب چارواکي د پاکستان په وروستیو بریدونو کې ملکي وګړو ته د اوښتې مرګژوبلې په اړه خواشینې ښودلې او وايي، جګړه پر افغانستان تحمیل شوې ده، خو طالبان تر دې مهاله پر شته ګواښونو برلاسي دي.
نوموړي دا څرګندونې پر داسې مهال کړې دي، چې د طالبانو او پاکستان ترمنځ نښتې له تېرو څو اوونیو راهیسې روانې دي او دواړه لوري یو بل ته د درنو زیانونو د اړولو ادعاوې کوي.
طالبانو له واک ته رسېدو وروسته یو پراخ کمپاین پیل کړی چې د افغانستان ځوانان د طالباني تفکر پر لور جذب کړي، خو دې هڅو سره له دې چې د هېواد ستونزې نه دي اوارې کړي بلکې وضعیت یې لا نور ترینګلی کړی دی.
په تېرو دریو کلونو کې د دیني مدرسو شمېر د تېرو شلو کلونو پرتله پنځه برابره زیات شوی، چې اوس یې شمېر نږدې ۷۰۰۰ ته رسېدلی او لا هم زیاتېږي. افغانان اړ دي چې خپل اولادونه ښوونځي ته ولېږي، آن که دا ښوونځی مدرسه هم وي.
د طالبانو د پوهنې وزارت د مدرسو او دارالحفاظونو مشر عبدالرزاق صدیق رسنیو ته ویلي و: «افغانستان یوه مذهبي ټولنه ده او هر کس باید لومړنۍ او د لوړې کچې دیني زدهکړې ولري. له همدې امله موږ د دیني مدرسو وده ضروري بولو».
خو دا فکر آن د طالبانو دننه هم پراخ ملاتړ نه لري. ځینې طالب چارواکي وایي چې افغانستان یوازې طالب او ملا ته اړتیا نه لري بلکې انجینرانو او ډاکټرانو ته هم اړتیا ده. دا وضعیت نړۍ ته یو انزوا طلبه او افراطي افغانستان معرفي کوي چې نه یوازې کولتوري ستونزې لري، بلکې سیمه او نړۍ ته قوي امنیتي ګواښ هم پېښولی شي.
که څه هم افراطي فکرونه پراخېږي، خو ټکنالوژي دا وړتیا لري چې له افراطیت سره مبارزه وکړي. انټرنټ او رسنۍ هغه څه دي چې په اوسني عصر کې ورسره ځوانان په بېلابېلو ډولونو نښلول شوي دي. د شمېرو له مخې، د افغانستان ۶۷ سلنه وګړي لږ تر لږه میاشت کې یو ځل ټلوېزیون ګوري، چې دا ۱۲ میلیونه ماشومان او ۱۴ میلیونه ځوانان رانغاړي.
نجیب پیکان زیاتوي، چې تر ټولو مهمه مسئله له دې ځوانانو سره د اړیکو جوړول دي: «افغان ځوانان په دوو برخو وېشل کېدای شي. لومړی، تحصیلکرده او ناراضه ځوانان دي چې په میدان یوازې پرېښودل شوي او د بدلون ځواک یې له لاسه ورکړی. دا هغه ځوانان دي، چې که څه هم ناهیلې دي، خو د ځان ژغورلو یوازینۍ لاره د آزادې نړۍ سره همکاري ګڼي.دویم، هغه ځوانان دي چې د طالبانو په اداره کې دي؛ هغوی افراطي شوي. هر کال نیم میلیون طالبان له مدرسو فارغېږي او د افراطیت پر لور ګام اخلي.»
د حالاتو د بدلون لپاره باید له دواړو ډلو سره کار وشي. تر ټولو مهمه لاره دا ده چې د رسنیو، خبرو اترو، کنفرانسونو او مشورو له لارې د ځوانانو ترمنځ پل جوړ شي، ترڅو هغوی انتقادي فکر ته وهڅول شي او خپل بحثونه له دین او آخرت څخه ور هاخوا هم وغځوي.
دا ځوانان کار غواړي، او د کار موندلو لپاره اړیکو ته اړتیا لري. له هغو هېوادونو درس اخیستل کېدای شي، چې د ځوانانو کچه پکې لوړه ده، او دغه ځوانان د سمې لارې پر لور هڅول کېدای شي.
