د افغانستان د وزلوبې ملي لوبډله په نړۍوالو سیالیو کې د ګډون لپاره قزاقستان ته ولاړه
د وزلوبې فدراسیون اعلان وکړ، چې د افغانستان د وزلوبې ملي لوبډله د «کوک پار» په نړۍوالو سیالیو کې د ګډون لپاره قزاقستان ته تللې ده. دغه سیالۍ به د یکشنبې په ورځ د کب ۲۴مه تر د وري لومړۍ نېټې د قزاقستان په ترکستان ښار کې د ۹ هېوادونو د لوبغاړو په ګډون ترسره شي.
په دغه سیالیو کې به د افغانستان، چین، قزاقستان، هنګري، منګولیا، ازبکستان، روسیې، تاجکستان او ترکیې لوبډلې د اتلولۍ لپاره سیالي وکړي.
تر دې وړاندې د طالبانو د المپیک او بدني روزنې ادارې مشر احمدالله وثیق هم ویلي و، چې د افغانستان د وزلوبې ملي لوبډله به له نهو کلونو ځنډ وروسته یو ځل بیا د قزاقستان په کوربهتوب د «کوک پار» په نړۍوالو سیالیو کې ګډون وکړي.
وزلوبه یا کوک پار د منځنۍ اسیا او افغانستان دودیزه لوبه ده، چې په وروستیو کلونو کې یې نړۍوالې سیالۍ هم جوړېږي.
